SAMA MANAH: Udin enggau Esner Nala beduet merindang temuai nengah lagu baru seduai.
KOTA SAMARAHAN: Pengawa ngelanchar album artis OCHSP Sound Production, Fiedarus Udin – Penyayau Enda Lenyau kenaka 4 Mei tu tadi nerima sambut ke manah ari urung 400 iku peminat di Summer Mall, Kota Samarahan.
Peminat udah belabuh nedatka palan pengawa urung pukul 11:30 pagi, ke alai dulu agi ari nya sesi nguji sada nyawa nembiak mit bisi diatur.
Lapan iku nembiak mit meranika diri ngulu sesi sada nyawa nya ke alai sida dipinta mai lagu ti dikeluar OCHSP ba panggau ke disedia.
Nyata, raban nembiak mit nya ngembuan pengelandik belagu ti ngujungka sida nerima puji ari temuai ke datai ti bela betempik jari.
Gaya pengawa di palan bebelika barang nya majak rami pengudah Chairman Gerempung Artis enggau Pemuzik Dayak (DAMA) Snowdan Lawan datai muakka tengahari.
Seruran meratka pengawa ke dikereja gerempung, Snowdan ke mega kaban Kunsil Nengeri Balai Ringin muji pengawa manah ke diatur OCHSP.
“Ngarapka mayuh agi kompeni rekoding di nengeri tu, ari pupu bansa ke bukai kelimpah ari bansa Iban nyaup ngerembaika industri muzik Dayak.
“Industri muzik mega ulih nyaup ngedutka kaul entara pupu bansa di nengeri tu. Kemansangka lagu kitai Iban nitihka alun baru muzik jeman ke diatu ngambika ulih ngemantup pinta enggau peneka raban peninga,”pia ku iya maya ngelanchar album Fiedarus Udin.
Temuai ke datai maya nya mega diperindang enggau sekeda tanda ari Gerempung Main Asal SMK Muara Tuang ti betuaika Cikgu Winnie Anyan, kelimpah diperindang raban artis OCHSP baka Jessica Remaya, Laila BJ, Eisner Nala, Donny Lang, Dat Sejili, Apai Saloi, Leez Zwita enggau Reymus Bilong.
Fiedarus Udin mantaika 4 iti lagu ari album ke baru dilanchar.
Seiku penebah sape ke majak pegari di nengeri tu, Brandon Daby mega bela mantaika alun munyi sape rentak baru iya lalu enda tinggal mega Snowdan mantaika pengelandik diri bemain gitar seraya diiring band ‘Aka Dambai’.
Panggau endur ngemujur pengawa ngelanchar album nya mega dibuka ngagai peminat ke bisi datai, ke alai sekeda peminat beambi awak beduet enggau Jessica Remaya ti mai lagu Aya Gerobi.
Kena nutup pengerami OCHSP Summer Mall, bala peminat diperindang band ‘Aka Dambai’ nengah sekeda ari lagu sida ti deka dikeluar enda lama agi.
Kelimpah pemerindang ba atas panggau, OCHSP mega bisi nyual sekeda album ari artis sida ke sebedau tu, enggau poster.
Peminat tau meli album Fiedarus Udin di kedai VCD ke besemak enggau sida, lalu beli meh ke tulin nyadika kelai meri sukung ngagai Industri Muzik Iban.