Dikarang Jacqueline David //
KUCHING: Kerusi Kunsil Nengeri (DUN) Bawang Assan, Bengoh, Engkilili, Opar ti dipangku ulih Kaban Kunsil Negeri (ADUN) kediatu sereta alai sida menang maya Pengawa Bepilih Besai Menua (PRN) nengah Parti Sa’ati Rayat Sarawak (SUPP) dipinta nganjung surat ningkilka diri nyadi kaban parti nya lalu mulaika kerusi DUN ti dipegai sida ngagai SUPP.
Presiden SUPP Tan Sri Peter Chin Fah Kui madah, empat ADUN ke udah ningkilka diri ari parti SUPP lalu agi mengkang mangku kerusi DUN sitak nya dipinta nganjung surat ningkilka diri ari parti lalu mulaika kerusi DUN nya ngagai SUPP.
“Kami mantah sida iya (empat ADUN) mai kerusi SUPP nya ngagai TERAS (Parti Tenaga Rakyat Sarawak) laban TERAS ukai Barisan Nasional (BN) kediatu….Nya baru ulah ke betul enti sida iya ningkilka diri ari parti manah-manah lalu mulaika kerusi SUPP, lalu atur kami tu nadai bebagi agi,” ku Chin.
Chin madah munyi nya lebuh dirandau pengudah ngepunka atur Pengerami Nyambut Taun ke-55 penumbuh parti nya sereta atur pengawa nikika kain tambai SUPP ulih presiden parti bepalan ba Indu Opis SUPP di Jalai Onh Kee Hui ditu kemari.
Ku iya, sapa-sapa kaban parti ke enggai agi nitihka parti, tau ngebuka diri ari parti.
“Sida iya bisi dua iti pilih, agi mengkang enggau parti tauka pansut ari parti. Anang madahka diri agi enggau parti tang ulah enda mandangka pemerat ngagai parti.
“Mayuh kaban parti madahka sida iya sayauka parti, tang enti kitai amat-amat sayauka parti, pandangka penyiru kitai nya enggau chara gawa ke parti, ukai gawa ungkup ketuai parti ke dititih kita, gawa ke mensia mayuh.
“Anang semina manis ba mulut aja tang udah nya ngelaban parti,” ku iya.
Empat kerusi ke agi dipangku ADUN Bawang Assan (Dato Sri Wong Soon Koh), Bengoh (Datuk Dr Jerip Susil), Engkilili (Dr Johnichal Rayong Ngipa) enggau Opar (Ranum Mina), semua kerusi nya nitihka prinsipal, enti BN nengah SUPP lalu kerusi nya patut dipulaika ngagai SUPP.
“Nadai kebuah kami (SUPP) enggai ngambi kerusi nya pulai baru. Ukai kerusi ke pansut ari parti tang orang ke bediri ba kerusi ke pansut.
“Dah datai maya PRN ila pan, maya milih chalun, iya nya chalun ke patut bediri ba kerusi nya chalun kami SUPP. Semadi meh kami madahka diri nadai chalun deka diasuh bediri laban enda ulih menang,” ku iya.
Ba penyarut parti ke pengabis baru bekait enggau ex-chairman SUPP Sibu, Wong ke ningkilka diri ari parti bedau lama tu tadi, pekara nya lalu bedau dipejurai enggau Menter Besai (PM) Datuk Seri Najib Tun Razak, taja pan suah betemu enggau PM maya bisi atur pengawa, ku Chin tang sekretari politik PM udah nemu pasal penyarut tu.
Ba penemu iya pasal TERAS, ku iya, enti TERAS amat-amat deka masuk BN, sida iya patut nganjung peminta sida iya, dipejuraika dalam aum BN.
Ba timbal iya, kati SUPP deka mantah TERAS masuk BN, iya madah, pekara nya udah suah dipadahka iya lalu SUPP mengkang enda ngubah penemu sida iya nya enda nerima TERAS.
“Kediatu aja, komponen parti BN ba renggat menua, SUPP endang enda setuju TERAS masuk BN, lalu pelaba aku SPDP balat agi enggai, lalu pia mega PRS bela enda setuju ketegal kerusi Pelagus.
“Parti bukai baka MCA di Sabah, enti sida iya nemu TERAS diterima masuk BN, bah…Bakani ila deh enti parti komponen deka ngaga utai ke sebaka? Bakani ku penemu UMNO?,” tanya Chin ke enda nemu bakani ku TERAS ngasaika sida iya ulih diterima komponen BN.
Naka kediatu, dalam SUPP, sida iya bisi seiku Menteri ba renggat Perintah Besai, iya nya Kaban Parlimen Serian ti mega nyadi Menteri Sumber Mensia Dato Sri Richard Riot, Menteri Muda Pemansang Menua Pesisir enggau Pengawa Berumah Datuk Francis Harden (ADUN Simanggang), Menteri Muda Lumba enggau Main sereta Menteri Muda Penyambung Datuk Lee kim Shin enggau seiku senator, Prof Sim Hui Kian.
“Nya alai dalam jaku aku tadi, nitihka atur moral (ulah) semua ADUN tu meseti badu ari parti tu lalu mulaika kerusi sida iya ngagai SUPP laban kerusi nya ukai ulih sida nengah TERAS. Nya alai ba penemua aku aku, enti sida iya beratika ulah bansa nya nyadi ketuai, titihka atur tauka prinsipal tu,” ku iya.
Ba penemu iya ba Formula BN+ (plus), Chin madah taja pan pekara nya bedau diperundingka enggau sapa-sapa tang nadai kebuah bisi BN+.
“Penyarut ke nyadi dalam taun 1983, bisi penyarut bansa ke nyadi udah abis pengawa bepilih ketegal Parti Bansa Dayak Sarawak (PBDS), tang gaya kediatu enda sebaka, semina sekeda orang ke enda lantang ati enggau Indu Parti ke mai sida iya ningkilka diri ari parti,” ku iya.
Ba atur pengawa nya kemari mega, ex presiden SUPP Datuk Patinggi Tan Sri Dr George Chan Hong Nam madah TERAS ukai parti ke ngemba sida iya, laban beratika kaban SUPP ke mayuh nurun sama enggau ngerami ulang taun parti nya kemari.
“TERAS ukai penanggul ba kami,” ku Chan taja pan iya enggai nimbal pasal kerusi SUPP ke diuan ulih ADUN kediatu enti iya patut dipulaika ngagai SUPP.
Di Sibu, kaban SUPP sehari tu (kemari ) nyambut Hari Ulang Taun SUPP ke-55 tang nadai digulu ulih ex-chairman SUPP, Wong.
Kelimpah ari nya, taun tu SUPP deka ngatur Aum Besai PenyertaTiga Taun Sekali (TDC) ke dijangka tanggung pegawa nyadi presiden nadai dipelaban.
“Aku deka madah baru ila, tang ke ditemu aku rintai kaban bukai ke dijangka deka bediri bepilih maya TDC tu ila, nama-nama sida tu udah bisi…Orang ke ditemu endang ngemeratka parti. Orang bansa tu endang patut dipilih, ukai orang ke enda tentu pendiau tauka takut,” ku iya.