KUCHING: Barang sapa ke setuju enggau penemu nerima Parti Tenaga Rakyat Sarawak (TERAS) masuk Barisan Nasional (BN) patut berunding dedalam, beratika pekara ke besai agi iya nya penyerakup dalam BN, ku pemerati politik, Dato Peter Minos.
Ku iya, diatu dipeda baka bisi sekeda orang rindu ke penyarut majak nyadi dalam BN nengah chara mejal sereta nyekat sebarang singkang kena nyerakupka BN ti besebutka pasal atur sereta nyerungkai pekara lama lalu nempa isu kena mambarka penyerakup.
“Sekeda penemu orang ti nyekat parti baru nya masuk gempung BN enda ingatka diri bisi kaul enggau parti lebuh penyakal bebendar ngelaban BN. Ketuai BN nerima orang ti enda rindu ke parti dalam BN masuk BN laban deka nyerakupka kaban politik dalam BN.
“Kati gaya enti sema BN nambit pintu sereta enggai nyendia palan endur sida, tauka nya dikumbai berakup? Kati gaya enti ketuai BN ngembuan asai ati deka malas dendam ketegal pekara ke udah nyadi suba ? Tu meh maya kaban BN begempung ari baruh BN, lalu pekara tu patut dikemeratka,” ku iya.
Iya enda nemu nama kebuah orang enda ulih berati pekara ke besai agi sereta meri awak ngagai chairman BN Sarawak BN Tan Sri Datuk Amar Adenan Satem ngaga inisiatif ngempung BN, ku iya.
Ku iya, penyerakup nya beguna amat laban enti nadai penyerakup, bala kaban enda bebasaka ketuai ti dekaka penyerakup. “Penyerakup meh ke nanggam kaban dalam parti tauka perintah champur baka BN, laban enti nadai asai ati deka berakup, parti nya pan deka punas dudi ila,” pia ku iya.
Ku iya, Adenan dipeda udah bebendar amat deka nempa penyerakup dalam BN, beri mih iya peluang nempa penyerakup dalam BN.
“Endang udah tanggungpengawa Chairman BN Sarawak mutarka penyarut ke nyadi dalam BN, sereta ngempung BN. Tanggungpengawa nya berat sereta mar, nya alai enti kitai endang amat taluk ke BN, kitai patut bebasaka chairman BN ke minta kitai berakup.
“BN Sarawak deka betapi enggau pemar enti peminta iya enda dikeibuhka.Uji perunding memanah, ngetu beserekang penemu sereta pendingka jaku ketuai kitai. Chairman BN enda bechiping ati sereta enda ibuh ke pekara ti enda menuku dalam politik sereta deka ngumpul pengering dalam BN,” ku Minos.
Enti penanggul ke diatu majak nyadi, penyakal rerakah ketawa lalu deka menang ba sekeda penuduk BN maya pengawa bepilih dudi tu ila.
“Nya mih pekara ti patut seruran dikeingatka kaban BN, sekalika nya pekara mit tauka besai. Nunda jaku seiku philosopher ,munsuh begawai ba mua pagar enti kitai belaya sereta bepelara. Engka mega sida benung gaga ati ke nya diatu, laban bala kaban BN benung kiruh charut enggau pangan diri,” ku iya.