Dikarang Judan Bungap
PEMERI NGAGAI RAYAT: Gramong (empat kanan) nyuaka bantu ngagai seiku penerima di Kanowit, ensana.
KANOWIT: Sepenyampau RM975,000 geran ari perintah mujur disua ngagai 146 iku penerima ari sitak Kunsil Nengeri (DUN) Machan, ensana.
Geran nya disuaka Kaban Kunsil Nengeri (ADUN) Machan Datuk Gramong Juna ba Opis Pelilih Mit Kanowit ditu.
Sida ke nerima tu iya nya Komiti Pengelikun Genturung Pendiau (JKKK) ari genturung pendiau enggau rumah panjai kelimpah ari gerempung ukai dikuasa perintah (NGO) bukai.
Ba jaku iya, Gramong ngelalau semua penerima melanja enggau bekelimat geran nya ke penguntung semua.
“Geran tu tau dikena kita nyeruri rumah panjai berebak enggau Gawai Dayak ke deka disambut enda lama agi,” ku iya.
Iya mega madah, pemeri nya disua ninting taun enda ngira bansa, pengarap tauka politik sida ke nerima.
“Pengari rayat patut nerang enggau nyemetak ngagai rayat laban bisi ngembuan peragam ke enda manah senentang geran tu,” ku iya nandu.
Bela bisi datai maya tu iya nya Pemesai Opis Pelilih Mit Kanowit Ibrahim Kipli, Sekretari Politik Kepala Menteri Maurice Giri enggau Pemesai Opis Pemadah Kanowit Wan Mohd Zuki Wan Ismail.