BINTULU: Raban Dayak di nengeri tu berasai lantang ati ngasaika pemansang kenyau ari ngelui 30 taun Barisan Nasional (BN) merintah nengeri tu, ku Menteri Pemansang Perengkaguna Mensia Mayuh enggau Komunikasyen, Dato Sri Michael Manyin Jawong.
Ku iya, enti dibanding enggau gaya pengidup kelia, peranak menua tu lebih agi Bansa Asal udah mayuh berubah dalam mayuh bengkah bidang ti ngujungka sida sama peninggi enggau bansa bukai.
“Taja pan bisi berita selebubu ari sesetengah raban ti madahka bansa Dayak tinggal ba pekara ekonomi enggau pelajar, tang penemu nya enda betul laban enti kitai meda diatu mayuh bansa kitai udah mujur dalam pelajar enggau pengawa dagang setanding enggau bansa bukai,” ku iya bejaku maya Pengerami Mantar Gawai Tikas Pelilih Bintulu kena malam Hari Enam nyin tadi.
Pengerami nya diatur Serakup Bidayuh Sarawak (DBNA) begempung enggau serakup Dayak bukai ti digulu lebih 1,000 iku temuai ari mayuh bengkah pupu raban bansa.
Ku Manyin, Perintah Nengeri nengah bantu ejensi sereta opis ke bekaul ulih muka jalai ke pemadu manah kena mantu rayat di nengeri tu lebih agi raban nembiak ngambi teulihka tikas pelajar ke pemadu manah sereta landik milih kos pelajar kena ngulihka pengawa.
Iya mega ngelalau apai indai nyaup anak sida ke benung belajar ba institusyen pelajar tinggi milih bidang ti bekaul enggau industri sereta teknikal laban menua Bintulu nyadi palan endur bejalaika mayuh bengkah projek industri lebih agi SCORE.
“Bala pengajar engagu apai indai patut ngiring anak ngambika bisi pengerindu ba pengawa ti bekaul enggau teknikal sereta pengatur industri ke endang bisi pengawa puang ba makit kereja,” ku iya.
Manyin mega meransang raban Dayak di nengeri nguna awak kemisi maya Gawai Dayak ila mulaika diri ke menua ngambi ulih ngedutka kaul enggau diri sebilik sereta diri semenua.
Pulai ke menua nyerumba maya bisi pengerami endang udah dikemeranka kenyau ari kelia, kena ngenegapka institusyen ruang bilik enggau mensia bukai.
Nengah awak nya iya ngungkupka belanja RM60,000 ngagai komiti pengatur pengerami, ke alai RM30,000 endang ari iya empu lalu RM10,000 ari Menteri Muda Perengkaguna Mensia Mayuh (Kuasa Lekterik enggau Telekomunikasyen) Datuk Dr Stephen Rundi Utom enggau Menteri Muda ba Opis Kepala Menteri ke mega Menteri Muda Kaunsil Kandang Menua, Datuk John Sikie Tayai ditangkanka RM10,000 ari Kaban Parlimen Bintulu, Datuk Seri Tiong King Sing.
Malam nya, mayuh bengkah main bisi dibantaika baka betanda enggau belagu ari gerup betanding enggau belagu ti dikangau ngerami malam nya lalu ke penudi endar Pekit Keling enggau Kumang Gawai 2014.