Dikarang Chris Bishop
KUCHING: Raban ketuai ti baru masuk Parti Tenaga Rakyat Sarawak (TERAS) ti betuaika ex-presiden SPDP Tan Sri William Mawan enggau ex-Chairman SUPP Sibu Dato Sri Wong Soon Koh udah nemuai ngagai Kepala Menteri, Tan Sri Datuk Amar Adenan Satem di Wisma Bapa Malaysia kemari.
Tuju penemuai sida seraban iya nya ngenataika sukung ngagai Adenan enggau perintah Barisan Nasional (BN) Nengeri disambut manah Kepala Menteri.
“Sida seraban ngukuka ngagai aku dia sida deka masuk BN lalu seruran deka enggau BN.
“Aku lantang ati ningaka semaya sida lalu nadai utai ke dikejakuka pasal pekara nya.
“Kami ngelaluka sukung ari sida ngagai BN sereta deka berundingka pekara nya ba maya ke ngena,’ku Adenan.
Pekara tu deka dikenataika ngagai Menteri Besai Datuk Seri Najib Tun Razak ngambika iya nemu utai ke nyadi ditu, tandu Adenan.
Bejaku ngagai pemberita ba kaul ke sama, Mawan madahka sida seraban deka ngenataika pinta masuk BN ngagai Najib.
Ku Mawan ke mega Menteri Kanan enggau Menteri Pemansang Rama, kami deka nyuaka surat ngenukuka diri masuk BN ngambika ulih nampung pengawa meri servis.
“Pengudah kami semina ngaluska sekeda pekara dalam parti, surat ngenukuka diri masuk BN deka dianjung enggau naka pengelengkas,’ku Mawan.
Berebak engagu nya, Soon Koh madah penemuai sida seraban kena mandangka pengangkun ngagai Adenan enggau BN.
“Aku kediri ngarika komuniti China dalam tim tu, tang kami udah besemaya enggau pangan diri deka bekereja dalam seiti tim.
“Engka tanggungpengawa aku dipeda besai agi ari ketuai bukai, laban aku deka meri servis ngagai komuniti China nengah sukung sereta chakah agi gawa ngambika ulih matak sida nyukung BN kelebih agi raban nembiak.
“Kami udah bebendar matih raban nembiak ngambika profesionyel, ukai semina komuniti China aja tang mega semua bansa ke udah nyukung BN,’ku iya.
Tu meh maya kami ngarapka diri ulih menang mayuh agi penuduk ba pengawa bepilih ke dudi tu ila, ku iya ke mega Menteri Pekara Wang II enggau Menteri Opis Kunsil Kandang Menua.
Bela bisi enggau maya ke nemuai nya ADUN Tasik Biru ke mega Menteri Muda Pemansang Industri, Datuk Peter Nansian, ADUN Marudi ke mega Menteri Muda Perengkaguna Mensia Mayuh sereta Menteri Muda Betanan Betupi, Datuk Sylvester Entrie, ADUN Batu Danau, Paulus Ngumbang, ADUN Bekenu ke mega Menteri Pemansang Ruang Bilik enggau Pelajar Nembiak Mit, Rosey Yunus.
Bela bisi dipeda dia maya nya ADUN Bengoh ke mega Menteri Muda Pengerai Mensia Mayuh, Datuk Dr Jerip Susil, ADUN Engkilili Dr Johnical Rayung, ADUN Opar Ranum Mina enggau ADUN Pelagus (SWP) George Lagong.