KUCHING: Menteri Kunsil Kandang Menua enggau Pemansang Raban Bansa Dato Sri Wong Soon Koh madah, tiga buah projek pemansang besai di baruh Langgur Pemansang Malaysia Lumpar Ke-10 (RMK10), projek sepital Petra Jaya, sepital baru Lawas enggau sepital baru Sri Aman benung dalam renggat dipejalai.
Iya madah, tiga projek besai nya enti tembu ila, sepital Petra Jaya ulih nangkup 300 buah katil, sepital baru Lawas (76 katil) enggau sepital baru Sri Aman 108 buah katil.
Naka bulan April tu tadi, projek ngaga sepital Petra Jaya udah manggai 10.01 peratus (%) dibandingka enggau ditimpuh ti udah ditetapka 10.39%, ku iya.
Sepital baru Lawas ku iya, renggat keterubah udah mujur lalu renggat 2A diatu benung dipejalai.
Taja pia, bekaul enggau sepital baru Sri Aman langkar ti diperambu Opis Kereja Raya Malaysia udah ngelui ari belanja asal ti udah dikemendar iya nya RM200 juta, ku iya.
“Berindik ari pekara tu, proses tinda renggat kedua diketuka dulu laban Opis Menteri Pengerai nganti pemendar belanja tambah ari Unit Perambu Ekonomi (EPU) sebedau projek sepital baru Sri Aman dipejalaika, sekalika nitih langkar asal tauka enda.
“Aku amat sinu sereta nemu peranak di menua Sri Aman amat begunaka perengka nya sereta ngansak sepital Sri Aman ti lama dianti enggau jampat.
“Laban enti nadai sepital baru tu, peranak Sri Aman deka berubat ngagai sepital ti pemadu semak iya nya Sepital Besai Sarawak di Kuching ditu ti 200 kilometer penyauh sereta tiga jam pejalai nengah jalai darat,” ku iya.
Wong mansutka pekara nya lebuh ti nyimpul jurai Opis Menteri Kandang Menua enggau Pemansang Raban Bansa ba Aum Kunsil Nengeri ditu, kemari.
Nambahka nya lebuh ti ngenang pasal pengerai di Sarawak, Wong madah, kes penyakit denggi diatu ba tikas ti enda ngirauka ati sereta nunjukka penurun dibandingka enggau taun nyin kemari.
“Nitihka rikod berengkah 1 Januari ngagai 23 April 2014 bisi 372 kes denggi di Sarawak dibandingka enggau timpuh ke sama taun 2013 ngerikodka 608 kes, tu ngayanka penurun 38.8%.
“Tu ngayanka pukul rata denggi diripot di Sarawak iya nya 22 kes tiap minggu, lalu tu ba garis normal (enda ngirauka ati),” ku iya.
Naka 24 April 2014 ku iya, bisi penyadi kes denggi dirikod, ba tiap pelilih mit menua Sibu bisi 115 kes, Miri (63), Bintulu (24), Kuching (24), Daro (23) enggau Limbang bisi 14 kes.
Berebak enggau nya kes pemadu tinggi pengelekai penyakit denggi iya nya Sibu bisi tujuh kes, Miri (5), Daro (4), Kuching (2), Limbang (2) sereta Bintulu, Betong enggau Simunjan sama ngerikodka seiti kes aja.
Iya madah, dikena mutarka kes denggi ti ngeruga pengerai, mayuh macham kimpin enggau aktiviti dipejalaika nyengkaum ‘Ops Gempur’, gotong-royong sereta nyadung penerang bekaul enggau pengerai enggau program ke bukai.