KUCHING: Lima taun ke udah, beribu peranak Telang Usan nadai kad pengelala (KP) tang diatu semina urung 500 – 600 aja tinggal.
Pemujur tu asil ari pengawa Opis Pengerijista Bansa (JPN) Sarawak nengah ‘Unit Khas Bergerak’ (UKB) enggau pengelunggar atur kena gaga sereta ngisi pom Mykad enggau surat beranak.
Kaban Kunsil Nengeri (ADUN) Telang Usan Dennis Ngau (gambar) madah, diatu mayuh ari rayat ke diau di sitak nya udah bisi kad pengelala udah perintah ngemuntangka proses enda ngukum enti pengawa ngerijista nya laun digaga.
Iya madah ngelama tu rayat di sitak nya seruran bedalih kebuah enda betati ngaga dokumen nya, ketegal suntuk.
“Diatu kitai meratika pemayuh rayat di Telang Usan ke nadai kad pengelala nyangka bisi dalam 500 tauka 600 tauka kurang ari nya.
“Tu laban mayuh rayat ti udah nemu pemerat bisi dokumen kad pengelala,” ku iya madah maya dikerandau malam kemari.
Iya madah opis JPN mega udah dibuka di Long Lama ngambika ngemuntangka rayat di sitak nya ngaga dokumen pengelala lalu enda ibuh ke Marudi baka ngelama tu.
Iya mega madahka, urung 90 peratus ari 13,000 komuniti Penan mega udah bisi dokumen kad pengelala.
“Nya alai, jaku penyakal ke madahka nyauka 10,000 rayat di sitak Telang Usan nadai kad pengelala nya enda betul lalu semina digaga nyadi isu politik aja,” ku iya.
Lebuh dikerandau bekait enggau tekad ai Baram, Dennis madah, iya siti ari singkang Perintah nusun baru Telang Usan enggau sekeda sitak besemak enggau sitak nya.
“Tekad ai nya peluang ke pengabis manah beratika mayuh agi pemansang deka dibuka tauka dipejalaika di sitak Telang Usan.
“Di sitak tekad ai nya mega deka dibuka Bandar Baru Telang Usan ke deka nyadi palan ke mai penguntung ngagai rayat di sitak nya kelimpah ari nyendiaka peluang pengawa,” ku iya.