Dikarang Chris Bishop //
Pemanah sereta pengelikun gerija ti balat ngemeratka jalai pengarap tau nyadi chunto gerija bukai di Kuching
KUCHING: Gerija All Saints Tabuan, taja pan baru 3 taun ditumbuh patut diteladan gerija bukai di kandang mengeri tu, ku The Most Reverend Archbishop (The Province of South East Asia) Datuk Bolly Lapok.
Ku iya, pekara nentuka gerija manah sereta lantang cukup dikemerat enggaika dipeda orang enda ngemesaika jalai pengarap tauka Tuhan Jesus.
“Enti di menua ulu, pengawa begaga gerija tau enda kelalu manah ketegal enda dipansa bala mayuh. Singin meh kitai gerija ke manah tang chukup meh digaga ngambika lantang endur kitai sembiang.
“Di kandang mengeri, gerija patut digaga besai sereta manah ketegal kitai berimbai enggau palan pengarap bukai. Pekara tu dikemerat, gerija di Tabuan, Siol Kandis, Samariang enggau genturung pendiau bukai patut manding enggau gerija bukai,” ku iya.
Bolly mansutka jaku tu ba pengerami makai lemai ngintu 3 taun penumbuh gerija All Saints Tabuan ke digulu enda kurang ari 1,000 iku mensia, malam ensanus.
Iya nambah, nembiak rebak baru patut mega neladan pemanah pengawa ke udah dikereja komiti All Saints Tabuan nyentuk gerija sida dipeda chukup manah diatu.
Ku iya, komiti udah bebendar ngiga belanja dalam timpuh 3 taun tu lalu pengawa nya mengkang dipejalai diatu.
“Pengerami makai lemai tu entara sebengkah chara kitai ngiga belanja.
“Taja pan enda berapa pengerai dua tiga hari tu, aku tetap datai ngambika tau nyadi bulu balang, meri peransang ngagai kitai ke datai sereta bela besaup mantu gerija,” ku iya.
Ba kaul ke sama, Bolly ngansak raban keristin enda mudah dikeruga ari sekeda achuk tauka petenah raban orang ti ngembuan penemu kepapas deka ngelemi penegap pengarap kitai orang keristin.
Ku iya, kenyau ari jeman Tuhan Jesus kelia, orang ti kepapas sereta chemburu endang mantah gerija belama.
“Nya alai enti diatu kitai ninga orang ti kepapas mantah gerija, nya ukai pekara baru…nadai ngachau.
“Nyangka sida ulih mantah, nimbak kitai tang iya ke amat, sida enda ulih ngalahka penegap jalai pengarap kitai ke orang keristin,” tandu Bolly.
Ba kaul ke sama, The Priest-In-charge All Saints Church, Revd Nelson Sinken madah, pengawa ngemanah gerija nya mengkang dipejalai lalu deka dipajak belama.
Ku iya, bantu ari mensia mayuh mengkang dikelalu ke alai sida merambu deka masang lantai ‘tile’ ba balai sembiang sereta ngemanah sambung wayar lekterik.
Ba pengerami nya, All Saints nerima chek bantu RM10,000 ari Menteri Bekebun Bedandang Besai enggau Komoditi Datuk Amar Douglas Uggah ke disua pengari iya Dunstan Inggol ngagai Nelson.
Kelimpah ari nya, nitihka penerang ari Nelson, Menteri Muda Betanam Betupi Datuk Mong Dagang enggau Menteri Muda Pengintu Pengelantang Pendiau Robert Lawson Chuat bela besemaya ngagihka RM10,000 seiku ngagai gerija nya.
Bela datai Datin Mary Bolly, The Rt. Revd. Bishop Aeries Sumping Jinggan, Chairman Pengatur Pengawa Maxwell S. Landong enggau raban keristin bukai.