MARUDI: Pengerami Mantar Gawai Dayak ungkup sitak Marudi deka diatur ba Rumah Hillary Jungang di Nanga Ajoi, Tinjar kena 17 Mei tu.
Menteri Muda Perengkaguna Mensia Mayuh (Penyambung Ai) ke mega Menteri Muda Betanam Betupi (Gerempung Orang Bumai enggau Bekebun), Datuk Sylvester Entri Ak Muran deka bejadika pengerami ba rumah panjai ti urung setengah jam pejalai nepan perau ari pasar Lapok, sereta ngelui 120 km nengah jalai ari Miri.
Pengerami nya deka berengkah enggau pengawa ngelaluka Tuai Pengabang, ke alai iya disempulang Kaban Parlimen Baram, Anyi Ngau enggau raban iya.
Nya ditangkanka enggau pengawa bejadika Projek Nyambung Ai Ngagai Menua Pesisir ba Rumah Hillary sebedau makai lemai nya.
Pengerami nya ke bendar deka belabuh pukul 8 malam, ke alai dipunka enggau jaku ari Entri seduai Anyi kelimpah ari bala ketuai raban bansa bukai ke sama bela bisi ngulu pengerami lemai nya.
Udah nya lalu diatur pekit Keling enggau Kumang Gawai, ke alai sesapa ke bisi ati masuk pekit nya, tau ngerejista diri diatu.
Sekeda bala rekoding artis mega bisi dikangauka merindang mensia mayuh malam nya, kelimpah ari pekit ngajat enggau sekeda program ke bukai.
Bala temuai ari Nabor, Beluru di Bakong, Jegan, Teruking, Pengelayan enggau Marudi sama bela bisi ditesau datai ngulu pengerami mantar gawai nya.