SEBUYAU: Seraban 450 iku peranak ari Genturung Pendiau Entangor ditu ringat sereta tusah ati ngenang tanah Adat Bansa Asal (NCR) sida dikeruga pemaju ladang sawit.
Tukang pengerembai berita peranak menua nya, Benny Inggit madah, sida udah nerima surat ari luyar pemaju minta sida badu ngeruga tanah NCR ke mungkur pemesai ngelui ari 3,000 hektar nya.
“Kami ditu ringat sereta tusah ati ngenang nasit ke nuntung kami laban tanah ke dikembuan kenyau ari aki ini kami kelia dikeruga sereta deka dikemansangka nyadi ladang sawit, taja pan kami ditu mantah pengawa nya.
“Kami udah nerima surat ari luyar pemaju tanah nya sereta dipejal sida ngambika enda negu tanah nya agi,” ku iya madah ngagai pengarang berita ensanus.
Ku Benny, semua peranak menua nya tekenyit lebuh nemu tanah sida bisi diberi Surat Suwa Sementara tauka Provisional Lease (PL) taun nyin tadi.
“Kami udah berandau enggau Opis Tanah enggau Survei (JTS) sereta pemaju. Taja pan kami mantah, tang pemaju projek nya bekeran ngemansangka tanah,” pia ku iya.
Bagi tanah ke kena keruga, iya nya Tanah Menuku Lot 175 enggau Tanah Sebanggan-Kepayang Lot 741, Lot 742, Lot 743 sereta Lot 744.
Ku iya baru,surat mantah mega udah disuaka ngagai pemaju enggau JTS, tang nyentuk ke diatu tanah pemaju mengkang enda nginsit ari tanah nya.
“Tanah nya udah dikemansangka perank menua nya kenyau ari kelia, enti sema tanah nya dikeruga sereta dikemansang enggau ladang sawit, semua utai tanam dia baka rian punas magang,” ku iya.
Nengah awak tu, iya ngansak perintah enggau raban ke bekaul mantu sida mutarka penanggul ti ditapi peranak menua nya.