SRI AMAN: Menteri Muda Betanam Betupi (Pemansik enggau Dagang ), Datuk Mong Dagang ngelalau rayat kelebih agi ba kandang Kunsil Nengeri (DUN) Bukit Begunan anang nyual tanah Adat Bansa Asal (NCR) sida ngagai orang bukai.
Ku iya, tanah NCR tau meri penguntung ngagai orang ke ngempu tanah nya enti dikemansang nengah chara ke betul, ku iya.
“Engka rayat deka ngemansangka tanah NCR sida enggau utai tanam komersil sekalika nengah inisiatif sida empu tauka nengah projek begempung enggau perintah,” ku iya.
Mong ke mega ADUN Bukit Begunan bejaku munyi tu lebuh bejadika Program Mantu Rayat (MEMBARA) ba Rumah Morris Tukok, Antik, Sri Aman ditu.
Program MEMBARA nya mega diatur endur nyuaka surat tuku tanah sida nengah Seksyen 6 Atur Tanah Menua ngagai 26 iku Ketuai raban bansa ngarika rayat sida empu.
Kelimpah ari nya Mong mega ngelalau rayat meri kerejasama ba pengawa nyukat perimeter tanah NCR sida ti dipejalaika Opis Tanah enggau Survei (JTS).
Ku iya, nengah pengawa nyukat perimeter nya tanah NCR sida ulih dituku nengah Seksyen 6, Atur Tanah Menua sereta diaku perintah.
“Aku arapka rayat meri kerejasama ngagai JTS lebuh ti bejalaika pengawa nyukat nya sereta anang sesekali nguji nyual tanah NCR kita ngagai orang bukai enti tanah nya udah bisi geran ila,” tandu iya.
Bela bisi ngulu pengerami nya Kaban Parlimen Sri Aman, Masir Kujat, Kepala JTS Bagi Menua Sri Aman, Mohd Razali Arshad, Pemesai JASA Parlimen P.202 Sri Aman, Whelton Lumpoi, Sapit Direktor Opis Pengintu Pengelantang Pendiau Bagi Menua Sri Aman, Sharifah Ranimah Wan Assim enggau bala ketuai raban bansa ke bisi ba kandang menua tu.
Beserimbai enggau pengerami nya, Mong ngungkupka belanja RM20,000 ngagai JKKK Rumah Morris lalu RM5,000 ngagai Biro Indu sida.