Dikarang Rengenyan Labang enggau gambar Kong Jun Liung //
KUCHING: Karnival mini Pedagang Menua Pesisir (KUD) 2014 renggat nengeri Sarawak nyendiaka peluang ngagai pedagang biak ari menua pesisir meri kelala sereta nyual produk terus ngagai penguna tauka pemeli.
Nengah KUD pedagangn biak ulih nyual produk menua pesisir ti tusah tauka nadai dijual ba palan bebeli barang ke bebesai di mengeri.
Tuju KUD nya mega nyendiaka peluang ngagai pedagang biak ari menua pesisir besemekih enggau pangan diri ngena chara ti manah seraya ke ulih mansik tauka nemu pengelemi enggau pengelebih produk sida.
Ba renggat Sarawak karnival nya berengkah diatur 1 ngagai 4 Mei (seharitu)
KUD 2014 renggat Sarawak ti diatur ba Tebing Ai Kuching dipenyadika Menteri Pemansang Menua Pesisir enggau Kandang Menua Datuk Seri Mohd Shafie Apdal.
Pengerami empat hari berunggu nya ti diatur ari pagi nyentuk ke malam nerima sukung enggau sambut ti manah ari mensia mayuh ke diau di mengeri Kuching enggau ke ngelingi.
Kategori produk ti bisi dibantaika maya KUD 2014 nyengkaum pemakai enggau ai irup; tekstil enggau pekayan; produk nyaga pengerai enggau herba; barang pengelandik jari enggau tepa; asil bekebun bumai enggau produk bekaul enggau servis.
Kelimpah ari nya, entara program bukai ke bisi diatur baka ‘Program Business Matching; Auto show’; enchabut tiket benasit; pekit berapi; pekit karaoke; pekit tanda asal; senam seni 1Malaysia; pekit ‘poco-poco’, pekit nyura anak mit enggau ke bukai.
KUD berengkah diatur Opis Menteri Pemasang Menua Pesisir enggau Kandang Menua (KKLW) ba taun 2006 lalu nyadi proram dua taun sekali opis menteri.
“Ari taun 2006 ngagai taun tu penyampau orang dagang bumiputra bisi nambah iya nya 76 iku (2006) ngagai 600 iku orang dalam KUD 2013.
“Asil barang ke dijual nengah program KUD mega nambah iya nya RM98,750 ba taun 2006 ngagai RM2.65 juta taun 2013,” ku Shafie.
Penyampau orang ke datai ngagai pengerami tu mega manggai 1 juta iku ba taun 2013 dibandingka urung 12,000 aja taun 2006.
Taja pan KUD bisi diatur ba taun 2013, KKLW mega tetap ngatur dalam taun 2014 ti mungkur enam zon serata nengeri ke diberi nama Mini KUD 2014, lalu dalam taun tu Sarawak nyadi zon keterubah endur ngatur.
Temuai ke sama bisi datai ngagai pengawa bejadika KUD 2014 renggat nengeri Sarawak, Sapit Menteri Pemansang Menua Pesisir enggau Kandang Menua Datuk Alexander Nanta Linggi, Menteri Muda ba Opis Kepala Menteri (Pemansang Orang Dagang Bumiputera) Datuk Mohd Naroden Majais sereta Kaban Kunsil Nengeri (ADUN) Balai Ringin Snowdan Lawan, ADUN Opar Ranum Mina enggau ketuai raban bansa.
Kelimpah ari KUD, KKLW nyendiaka mayuh macham program dikena mantu orang dagang menua pesisir baka Sekim Pinjaman Ekonomi Desa (SPED), Program Rural Business Challenge enggau Program Desa Lestari.
Bepelasarka dalam teks jaku Shafie ke disadung ngagai raban pengarang berita, raban orang dagang menua pesisir patut besedia betapi enggau mayuh pemerat dalam pengawa dagang.
Berindik ari nya orang dagang lebih agi ari menua pesisir enda tau enda ngembuan integriti tinggi baka enda bechiping, runding ti positif, sereta pengeliat ati bejalaika pengawa dagang.
Nyema nadai bechiping dalam dagang, orang ti bebeli tauka begunaka produk deka bisi pengarap sereta seruran deka datai bebeli nyentukka jemah ila.
Dalam pengawa dagang runding ti begedi sereta kepapas enda patut dikemeran, tang patut besemekih ngena chara ti betul.
Dikena betapai enggau ubah ti kelalu jampat, orang dagang patut nambahka penemu enggau pengelandik dalam semua pekara baka pengelandik teknikal, ICT enggau akademik.