MIRI: Sarawak deka betapi enggau pemar dalam kandang 16 taun, laban deka mekalka chukup pengereja pengawa ke landik nyerumba taun 2030.
Menteri Muda ba Opis Kepala Menteri, ba Bagi Ngelakuka Pelajar Teknikel, Datuk Len Talif Salleh madah, nengeri tu diatu ngembuan 110 buah palan pelajar tinggi (IPT) ti bepelasarka latih vokasyenal.
“IPT nya palan ngelatih pengereja pengawa ngambika ngembuan pengelandik kena ngisi pengawa puang di nengeri tu, diatu enggau dudi ila,” Pia bejaku lebuh bejadika Projek LINK Shell enggau Kolej Vokasyenal Miri apin lama ke udah.
Ku iya, menua tu endang amat begunaka pengereja pengawa ke landik ti deka diisi bala nembiak beengkah ati diatu.
“Enti enda dilatih berengkah ari diatu, kitai deka mimit pengereja pengawa ari peranak emnua tu empu,” pia ku iya.
Ku iya, tu mega sebaka enggau sekeda perambu perintah menua nengah sekeda projek bebesai baka SCORE.
Nya mega ulih nyungkak nengeri tu nyadi sebuah menua industri ke alai rayat deka bisi penatai pemisi ke besai.
Ku iya, runding rayat ti madahka pelajar teknikel enggau latih vokasyenal nya bidang kelas kedua, patut diseliahka.
Bala nembiak kelebih agi ti udah ngambi peresa perintah, patut di dipujuk masuk dalam bidang nya ngambika sida ulih belatih nyadi pengereja pengawa ke landik sereta beguna ngagai industri dudi ila.
Sama bisi bejaku sebedau nya, Direktor Kolej Vokasyenal Miri, Sherene Choo enggau Menijer Besai Sarawak Shell, Berhad Chok Chee Tsong.
Pengerami nya mega disempulang enggau pengawa nyuaka setipikit akun ‘Shell 2013 CEO HSSE & SP Award’.