RABAN PENGANTI: Raban nembiak Sg Barie ti nyulut ba akademik, kokurikulum sereta ngembuan pengelandik nyadi ketuai ngiring nembiak bukai begulai enggau Sagah (enam ari kiba) sereta Edwin (enam kanan) pengudah nerima setipikit sida.
Lebuh maya kiruh, sida nadai hari berunding ngereja ulah ti enda manah laban ingatka iring ketuai: Suzana
Dikarang Edwin Jemat
SERIAN: Penumbuh Sekim Rondaan Sukarela (SRS) di baruh Rukun Tetangga (RT) ulih nyaup nyeliah sereta nagang pengelekai penusah rama baka ti ditapi raban nembiak diatu.
Pemesai Opis Penyerakup Bansa enggau Integrasi Nasional (JPNIN) Samarahan, Suzana Busalam bejaku munyi nya sebengkah pengerami ‘Malam Jasamu Dikenang’ ke diatur Rukun Tetangga (RT) begulai enggau Unit Saberkas Kpg Bintawa Sg Barie di Dewan Wawasan genturung pendiau nya malam Hari Lima tu tadi.
“Kitai enggai ninga cherita ti madahka raban nembiak enda tejagaka ulah diri lebih agi lebuh maya sida begelumu bebala mayuh ti tau ngujungka sida ngereja pengawa ti ngerugika diri,” ku iya.
Iya madah, nembiak suah agi teparuk ba ulah ti enda manah enti sida nadai pengawa menuku dikereja tang enti seruran kiruh sereta bisi ketuai ngiring, dia sida nadai hari mikir ulah ti enda manah.
“Taja pan nadai didinga ulah salahguna dadah tauka sebarang utai ti tau ngasuh gian, kitai patut landik nyeliah ngambika ulah nya enda nyumbuk. Baka api, sebedau nyerarai padamka dulu,” tandu iya seraya muji penyakah Komiti Rukun Tetangga (KRT) Sg Barie ke udah mujur ngatur program malam nya.
Seraya madah, RT Sg Barie ti ditumbuh kena bulan Julai 2010, diatu udah mayuh bejalaika aktiviti dikena ngerapit kaul entara kaban komiti sereta kedut enggau RT bukai di Pelilih Samarahan.
PENYELAI: Raban nembiak Jiran Muda ari baruh Rukun Tetangga Sg Baris ngayanka pengelandik ngajat atas san dipandang ngagai mensia mayuh.
“RT Sg Barie tu sebuah ari 54 RT di baruh JPNIN Samarahan ti ngembuan Jiran Muda enggau Jiran Wanita sereta udah numbuhka Sekim Rondaan Sukarela (SRS).
Berebak enggau nya, Suzana ngelalau semua komiti SRS besaup nyaga pengelikun kandang pendiau ti di baruh RT nya.
“Kita mega diperansang minta bantu piak polis ti nguasa kandang menua tu,” tandu iya.
Lebuh ngenang penanggul kaban SRS ti nadai palan endur ngatur pengawa, Suzana nyukung peminta belanja dikena ngaga Bilik Operasyen SRS Sg Barie ti dituju ngagai Sapit Speaker Kunsil Nengeri ke mega ADUN Tarat Datuk Roland Sagah Wee Inn.
Dulu ari nya ba jaku pengelalu iya, chairman RT Sg Barie Edwin J Nangkai ngenataika pengaga ati ngagai sukung semua lebih agi Sapit Speaker Kunsil Nengeri Datuk Roland Sagah, Pemesai JPNIN Samarahan, Suzana Busalam; RT Taman Anggerik enggau RT Rayang Serian; RT Lintang Baru, RT Sampun Tebun, Asa Jaya sereta mensia mayuh ti nyaup ngemujurka pengawa malam nya.
Bela bisi ngulu atur pengawa nya, Sapit Ketuai Trafik Indu Opis Polis Pelilih Mit Kuching ASP Poge; ketuai raban bansa ari genturung pendiau ti bekelingi, KK Jabu Ambau sereta mensia mayuh.
MELENTI BULUH ARI TUBU: Pemesai JPNIN Pelilih Samarahan, Suzana Busalam nyuaka setipikit ngagai seiku nembiak ti nyulut ba UPSR taun nyin kemari seraya dikemataka Edwin (kiba) maya atur pengawa nya.