KAPIT: Semua gerija ditu (Katolik, Methodist, SIB, Anglikan, enggau ke bukai) dedat endur raban keristin besembiang nyerumba ngintu Hari Easter (Holy Week) kena ngelaika pemati Tuhan Jesus ba kayu regang sereta angkat baru ba hari ketiga, lalu meri pengidup ke baru ngagai mensia.
Kapit ke tebal diuan raban keristin udah nurun bebala mayuh mandangka sukung ngintu pengerami nya.
Ungkup raban keristin Katolik, ‘Holy Week’ nya diintu nyentuk ke Hari Easter nyengkaum ‘Holy Thursday Mass’ ke diatur kena 17 April, pukul 7:30 malam. Entara atur pengawa ti dipejalaika nyengkaum Nuchi Kaki sereta Bejaga Nyentuk ke tengah malam.
Kena 18 April, iya nya maya ngintu Hari Paska ke alai ‘Holy Saturday Mass’ kena 19 April belabuh pukul 7:30 malam.
“Pengawa ke penudi endar diatur maya ‘Holy Week’ iya nya sembiang Easter Hari Minggu ke belabuh pukul 8 pagi.
Kena malam Hari Enam, raban katolik ditu ngintu ‘Holy Sat Easter Vigil’ betungkunka dian kena nyambut Tuhan Jesus ke udah idup baru.
Raban Keristin pechayaka Tuhan Jesus dikemalu, ditan, diukum sereta diperinsa nyentuk ke iya mati ba kayu regang kena Hari Lima, tang tiga hari udah nya iya idup baru, ke alai iya diterima dalam perintah Allah Taala. Raban Keristin mega pechaya, iya mati ke sida sereta diregang dikena nuchi dosa mensia.
Atur pengawa ke penudi endar maya ‘Holy Sat Easter Vigil’ iya nungkun dian besai ba ‘amphitheater’ ke ditungkun Reverend Father Alexander Rawi ke ditangkanka enggau pengawa bejalai bebala mayuh nuju palan endur besembiang.
Beserimbai enggau nya, bisi 21 iku raban keristin udah dibaptisa maya pengerami nya.
Penudah besembiang Hari Minggu kemari, tiap iku ke datai sembiang nya diberi ‘Easter egg’ ke udah diberekat reaktor Father Rawi.