NGAUL KOMUNITI: Mohd Sabtu (tengah) enggau bala mayuh enggau besenam Senamrobik.
RABAN INDU PDRM OP CANTAS KETERUBAH: Kira 20 lebih indu polis ke gawa di baruh Op Cantas udah dilatih.
KUCHING: Hari Tebuka Raban Gerakan Udara Polis Diraja Malaysia (PDRM) nerima timbal ke manah ari mensia mayuh, ke dijangka bisi manggai seribu lebih ngagai Hari Tebuka nya, ke disambut beserimbai enggau Hari Polis ke manggai 207 taun.
Atur pengawa Hari Tebuka nya ti diatur di Padang Merdeka, belabuh ari urung pukul 8 pagi, dipungkal enggau Senamrobik, pancharagam PDRM Sarawak, T-Baton PDRM, Op Cantas Indu PDRM, senam Zumba enggau pengawa pemandang.
“Tuju ngatur Hari Tebuka tu laban polis deka ngaul komuniti, laban nya siti ari pengawa polis ke bekaul enggau komuniti,” ku Kepala Polis Datuk Mohd Sabtu Osman madah lebuh dikerandau ba atur pengawa ‘Hari Terbuka Pasukan Gerakan Udara (PGU) PDRM Pangkalan Sarawak’ ke-14 di Padang Merdeka ditu, kemari.
Hari Polis diintu ninting taun, 25 March lalu disambut dalam kandang sebulan enggau mayu macham atur pengawa polis ngaul komuniti ke digaga di serata menua, di 28 palan polis ke bisi di pelilih menua tu.
Sebedau nya, Hari Polis mega bisi ngaga aktiviti gutung ruyung, meri darah, aktiviti pengarap, pekit pengasih golf ke bisi matak urung 100 iku orang.
Ba sebengkah ari aktiviti ke bisi dibantaika, iya nya Op cantas Indu PDRM ke mantaika penyikar 20 iku raban indu polis, Mohd Sabtu madah raban tu raban keterubah ke dilatih di menua tu, ke ditangkan enggau ngelatih Op Cantas Indu PDRM di Sibu, Miri enggau Bintulu.
“Naka kediatu, ke diplih sereta dilatih kami enda mayuh (Op Cantas Indu PDRM). Kitai meda bakani ku gaya pengelikun menua.
Siti ari pemerat ngambi indu polis ke ‘khas’ kena Op Cantas, mesti orang ke tau kaki jari, udah nya sida iya dilatih, chara nyerang, chara nangkap…Nya penemu ke enda tau enda,” ku iya.
Iya madah, ba pengawa ngambi indu nyadi polis ungkup bansa tu, indu ke bisi pengelandik dalam teknik-teknik ‘khas’ polis, sereta ngembuan pengerai enggau rikod ke manah.
“Ke batang, indu ke dilatih ‘khas’ bansa tu meseti orang ke bepengerai. Naka ke diatu, nadai penanggul ngiga indu ke nakal. Sida ke bisi diatu pan, udah dianjung gawa ke bisi bekaul enggau Op cantas.
“Tambah, lebuh sida iya masuk nyadi polis dalam ungkup pengawa baka tu, sida iya deka dilatih dalam teknik-teknik ‘khas’ belajar nangkap, nimbak sereta sikar kaki jari,” ku iya lalu nambah Op Cantas Indu PDRM ke diatu bepalan di Opis Indu Polis Kontinjen Sarawak (IPK).
Sama bisi nguluka atur pengawa nya kemari, Sapit Kepala Polis Datuk Law Hong Soon, enggau ex Sapit Kepala Polis Malaysia Tan Sri Jamil Johari.
NGENA BILUN: Bilun polis terebai mansa Padang Merdeka.