MARUDI: Sapit Kepala Menteri, Datuk Patinggi Tan Sri Alfred Jabu ke mega Menteri Pemansang Betanam Betupi diperambu nemuai ngagai Long Peluan sehari tu, lalu muak ke lemai nemuai ngagai rumah panjai raban bansa Kelabit/Saban.
Iya bemalam di Long Peluan, pia ku Kaban Kunsil Nengeri Telang Usan, Dennis Ngau.
Tuju penemuai ke Long Peluan laban ke deka ngabas pemujur projek nanam getah, lalu muak ke malam nya ngulu pengerami Ketuai Begulai enggau Rayat di Long Peluan ke alai pengerami nya deka digulu komuniti ke diau ba kandang menua nya nyengkaum bansa Penan enggau Saban.
Berebak enggau nya, Hari Dua, ku Dennis, iya deka nemuai ngagai palan pengentap berumah baru bansa Penan di Long Kerong seraya nerangka sentang polisi perintah enggau sekeda pekara ke bekaul enggau raban bansa Penan kelebih agi ke enggai diau mendam ba palan pengentap baru ti udah disedia.