NGERUGA PENGELIKUN: Mayuh penusah bebadi nyadi ba endur tu bepun ari senggal jalai ti enda dichat ngujungka mayuh enda ngadang bisi senggal jalai ba Lorong Dabai, Jalai Muhibbah, di Kanowit ditu.
Senggal jalai dikena nagang pengelaju kereban pengangkut darat patut dichat, ku Stephen
KANOWIT: Peranak menua ke nguan Lurung Dabai, Jalai Muhibbah ditu minta senggal jalai ba genturung pendiau sida dicat enggau lengkas.
Ku sida, kenyau senggal jalai nya digaga udah mayuh penusah bebadi nyadi ba palan nya.
Kaunsilor Stephen Chendang madah, penusah nya lebih agi nyadi nuntung sida datai ari menua bukai laban enda ngadang bisi senggal jalai ba palan nya.
“Enda ibuh disebut maya malam hari laban dia nadai lampu jalai ditambah senggal jalai nya enda dichat.
“Kitai minta piak ti bekaul ngechat senggal jalai tu tauka palan nya digaga pal tauka tanda enggau lampu ngambika penusah bebadi ulih seliah,” pia ku iya madah ngagai pengarang berita.
Empai lama tu mega ambis nadai dua bengkah penusah bebadi ba endur ke sebaka.
Penusah keterubah nyadi ba seiku nembiak beumur urung 20 taun ketegal mutosikal iya tepawa ke tisi jalai lalu bakal ba sebelah tubuh.
Tu ditangkan penusah kedua ti bela nuntung sida ke deriba mutosikal laban enda ngadang bisi enggal jalai digaga ba palan nya.
Kelimpah ari nya iya ti tegali ba jalai alun mimit da deka dilantak kerita ari belakang.