KUCHING: Kaunsil Penagang Penyalah Makai Suap Malaysia (SPRM) Sarawak, naka 21 March taun tu ngerikod penyampau 11 iku orang di baruh seksyan 17(b) Akta SPRM 2009 iya nya penyalah nyuap (meri suap).
Penyampau nya dipadahka Direktor SPRM Datuk Bahri Mohamad Zin dalam jaku iya ti dibacha Penulung Direktor SPRM Sarawak Wan Mohamad Wan Drahman ba pengerami Pekit Nimbak ‘Jemputan’ SPRM Sarawak 2014 ti diatur ba Lapang Sasar IPK Sarawak ditu, kemari.
Iya madahka pemujur SPRM ba pengawa betapi enggau penyalah meri enggau makai suap mayuh bepanggai ba komitment sereta kerejasama genap serak raban bansa nyengkaum ketuai ejensi perintah.
“Bepelasarka statistik SPRM Sarawak, naka 21 Mac 2014 SPRM nengeri ngerikodka 11 iku orang ngereja penyalah dibaruh sekyen 17(b) Akta SPRM 2009, penyalah nyuap.
“Taun 2013, SPRM Sarawak bisi ngerikutka 17 iku orang ditangkap ketegal penyalah dibaruh Seksyen 17(b) dibandingka enggau taun 2013 bisi 59 iku orang ketegal nyuap.
“Aku arap bendar penyampau penyalah nyuap tu nurun berindik ari orang mayuh udah ulih mereti iya nya orang ti nyuap mega deka diukum,” ku Muhamad.
Nambahka nya, iya madahka SPRM ari taun nyin kemari chakah ngatur ‘Kempen Perangi Pemberi Rasuah’ dikena meri penerang enggau penemu ngagai raban bansa iya nya ejensi penerit adat ngedut kerejasama enggau SPRM munaska penyalah nyuap.
Ku iya, model pengawa nagang penyalah makai suap patut tauka ulih ditumbuhka nengah Unit Integriti dalam opis tauka ejensi dikena nempa integriti enggau penegap runding enggai meri tauka nerima suap.
Munaska penyalah nyuap enggau makai suap sebengkah ari ‘Petunjuk Prestasi Utama’ (KPI) menua ti nunjukka perintah amat bebendar munaska penyalah bekaul enggau suap.
Kelimpah ari nya, iya madahka SPRM sebengkah institut perintah ti nunjukka ‘transparent’ pemadu tinggi dalam menua ke diatu beduduk ari ti bisi lima panel ngatika diri ti seruran matau pejalai SPRM.
“Taja pia, pemerat ke ditapi SPRM lebuh bejalaika tanggungpengawa munaska penyalah nyuap tauka makai suap di menua tu.
“Nya alai semua piak patut nemu pengawa munaska penyalah nyuap enggau makai suap ukai semina dilempai ngagai SPRM aja tang tiap raban bansa patut beserakup sereta meri sukung ngagai SPRM betapi enggau isu menua,” ku iya.
Sama bisi datai ngemataka pekit nya kemari Menijar Besar Tabung Baitulmal Sarawak Datu Abang Mohd Shibli Abang Mohd Nailie sereta Sapit Ketuai Polis Pelilih Mit, Indu Opis Polis Pelilih Mit Kuching Supritenden Fauzilan Abd Aziz.