KUCHING: Statistik ari Opis Insolvensi Malaysia (MDI) ngerikod urung 255,385 kes bankrap bisi dirijista manggai Januari taun tu.
Menteri ba Opis Menteri Besai, Nancy Shukri madah, ari penyampau nya, peratus nembiak ke disengkaum bankrap nambah ninting taun belabuh ari taun 2007.
“Ba taun 2012,urung 19,575 kes bankrap bisi dirijista lalu ari pemayuh nya, urung 130 iku baruh umur 25 taun dipadah bankrap.
“Pemayuh nya nambah ngagai 208 ba taun 2013 lalu manggai Januari 2014, pemayuh bankrap ari redak nya ngerikod 522 iku,” ku iya bejaku ba Program Ngangkatka Nembiak Bepemadah 2014 di Dewan Sebaguna Kompleks Belia dan Sukan Negeri Sarawak ditu, apin lama ke udah.
Iya nandu, nembiak ke berumur entara 25-34 taun, pemayuh sida ke bankrap ba taun 2012 bisi 3,970, nambah ngagai 5,212 ba taun 2013.
Ba bulan Januari 2014, urung 316 iku dipadah bankrap dalam kandang umur tu.
“Nembiak ke berumur entara 35-44 taun, bisi dalam 7,164 iku ba taun 2012, lalu 7,616 (2013), sereta 555 iku bankrap (Jan 2014),” ku iya.
Iya madah, entara kebuah ke ditemu utai tu nyadi, laban kurang penemu ba pekara kena bankrap baka ke bisi dalam genteran tusun ukum ‘Akta Kebankrapan 1967’.
Iya madah, reti kena bankrap iya nya senbengkah atur ke ninggang orang ke enda ulih mayar utang dalam penyampau RM30,000 ke atas.
“Ari kes ke nyadi baka tu, mayuh orang ke kena bankrap, iya nya orang ke enda mujur ngatur lun kerita sida.
“Pemadah Opis Insolvensi ke timpuh 2007 ngagai Januari 2014 mandangka urung 32,955 iku, iya nya 26 peratus ari penyampau kes bankrap ke dirijista udah kena bankrap laban enda mujur mayar pulai baru lun kerita lalu ditangkan enggau lun rumah (17.8 peratus) enggau lun orang kekediri bisi 15.7 peratus.
“Bechuntoka statistik nya, bisi pemerat nembiak di menua tu dipadah enggau penerang ke betul ngambika sida iya landik ngatur belanja diri,” ku iya.