KUCHING: Sebuah kapal kargo ke mai urung 130,000 liter minyak diesel enggau penyampau ke ditakar dalam mata duit urung RM1.6 juta (minyak diesel RM338,000 enggau kapal kargo dalam RM1.3 juta) mujur kena tangkap lalu nyadi kes ke pengabis besai naka kediatu ari tangkap Polis Marin, Opis Menteri Dalam Menua (KDN), Opis Pengawa Dagang Dalam Menua (PDNKK), enggau Polis Gerakan Am (PGA).
Direktor PPDNKK Stanley Tan madah, kapal kargo ke mai urung 7 iku anak kapal ari menua tu empu, maya ditan, kapal kargo nya benung belayar lalu mujur disekat polis dalam urung pukul 12 tengahari, Hari Dua tu tadi.
“Kemari kami nerima kapal kargo ke diserah ngagai kami, asil ari operasi begulai enggau KPDNKK, Opis Penagang Pengawa Makai Suap (MACC) enggau PGA, alai sida iya bisi nangkap sebuah kapal kargo enggau minyak diesel urung 130,000 liter enggau penyampau minyak ke kena tan dalam RM338,000, di Bintawa ditu.
“Minyak ke dibai kapal kargo tu dipelaba dibeli ari sindiket ke nyalah ngena minyak diesel Sabsidi ari stesyen minyak lalu deka dijual di sitak industri di sitak Sibu tauka Kapit,” ku Tan ke nyangka kapal kargo nya dalam pejalai ari Kuching-Tg Manis-Kapit.
Iya madah baka tu lebuh dikerandau maya meresa kapal kargo ke mai minyak diesel nya di palan nyimpan minyak di Bintawa ba palan polis marin ditu, kemari.
Iya nambah, enti nitih, kapal kargo nya dalam pejalai ari Kapit pulai ke Kuching, diesel sida iya patut dalam 20,000 liter aja tang lebuh diperesa, kapal kargo nya mai 130,000 liter diesel.
Tan nandu baru, penyampau kes ke bisi bekaul enggau pengawa nangkap minyak diesel ari 1Januari ngagai 11March 2014, manggai 10 kes enggau penyampau tangkap dalam mata duit RM2,173,740.00
Enti ditemu salah, ukum ke penyalah baruh Genteran Tusun Ukum seksyen 21 ‘Akta Kawalan Bekalan 1961’ ke seiku-seiku orang ke penyalah keterubah sida iya tau kena ukum enda lebih ari RM100,000.00 tauka kena jil enda lebih ari tiga (3) taun tauka kededua nya sekali, lalu penyalah kedua, tau kena ukum enda lebih ari RM250,000.00 tauka kena jil enda lebih ari lima (5) taun.
Ungkup opis koperat enggau kompeni, penyalah keterubah tau kena ukum enda lebih ari RM250,000.00 lalu penyalah nangkan nya tau kena ukum enda lebih ari RM500,000.00