KUCHING: Pelanda REDEEMS enggau REDEEMS Mountain Bike Race deka diatur begulai entara Association of Research and Development Movement of Singai Sarawak (REDEEMS) enggau Sarawak Energy Berhad (SEB) kena 29 March tu ila.
Presiden REDEEMS, Datuk Peter Nansian Ngusie dalam aum pengarang berita madahka dua bengkah lumba enggau main nya diatur nyerumba REDEEMS Youth and Sport Carnival.
“Kena 28 ngagai 29 March tu ila kami deka ngatur REDEEMS Youth and Sport Carnival ti bepalan ba REDEEM Community Centre, Jalai Kampung Apar-Segong, Singai, Bau.
“Dua pengerami besai diatur nyerumba tu ila iya na Pelanda REEDEMS enggau REDEEMS Mountain Bike Race ti diatur begulai enggau SEB. Kami nagit 300 iku orang nyereta Pelanda REDEEMS lalu pia mega REDEEMS Mountain Bike Race (300 iku).
“Timpuh ke penudi endur nganjung pom peminta nyadi penyereta tu iya nya 14 March naka pukul 12 tengah hari, lalu pekara bekaul enggau pom peminta nya ulih ditanya tauka dipinta ba opis SEB, diambi ari website www.redeems.my tauka Opis REDEEMS di Kuching (atas Maybank MJC).
“Masuk program tu bisi kena bayar mimit kelimpah ari ti bisi diberi baju,” ku iya ti mega nyadi Menteri Muda Tanggung Pengawa Raban Bansa.
Bayar masuk nyereta Pelanda REDEEMS Kategori Tebuka (21 KM) iya nya RM50; Kategori Indu (8 KM) RM30 enggau Kategori Junior (8 KM) RM30.
Lalu bayar masuk Mountain Bike Race iya nya Kategori Tebuka (45 KM) iya nya RM50; Kategori Indu (20 KM) RM30 enggau Kategori Junior (8 KM) RM30.
Kebuah SEB enggau REDEEMS ngatur program nya dikena ngelakuka lumba enggau main, mandangka pemanah rampa menua sereta idup bepengerai ngagai raban nembiak di Bau sereta semua raban bansa.
Nambahka nya dikena ngelakuka juluk REDEEMS iya nya ‘Towards an orderly and progressive society’ sereta meransang kerejasama entara orang mayuh enggau kompeni dalam pengawa ngelakuka eko-dagang temuai Sarawak.
Kelimpah ari nya nyerumba karnival nya ila entara main bukai diatur baka main bol, futsal, sepak takraw, bola jaring , Battle of The Band enggau mayuh aktiviti bukai.
Nitihku iya kelimpah ari karnival ti nyadi program tiap taun, REDEEMS mega deka ngatur Gawai REDEEMS ujung bulan Jun enggau Festival Puji dan Sembah REDEEMS, ujung bulan Disember.
“Kami mega beperambu deka ngatur Festival Pemakai Etnik ke dipelabaka deka diatur ujung bulan September,” ku iya ti mega nyadi Kaban Kunsil Nengeri (ADUN) Tasik Biru.
Perais ke disediaka nyentuk ngagai lumur sepuluh dalam semua kategori Pelanda REDEEMS (Tebuka, Indu, enggau Junior) sereta Mountine Bike Race (Tebuka, Indu enggau Junior).
Penerang silik pasal karnival nya tau diambi ari SEB nengah Liza Lee 0198860050 / Patricia Nanny 0198578843 / Irene Liew 0198592344 tauka REDEEMS nengah Kopar Gadong 0148857161 / George Abrham 0138041480 / Stephen 0128540766.