BINTULU: Opis Menteri Dagang Dalam Menua, Koperasi Enggau Pekara Bebelika Barang (KPDNKK) udah numbuhka sebengkah program dikena nyemaka ke rega barang ke dijaga rega kenyau ari taun 2009 nyentukka sehari tu, ku Kepala Opis KPDNKK Sarawak, Stanley Tan.
Ku iya, naka ke diatu ba Bintulu aja, opis udah netapka 29 bengkah zon nyadung barang lalu ngemaduka 17 bengkah kompeni dikena bejalaika pengawa sida ba menua tu nyengkaum Pelilih Mit Menua Sebauh enggau Tatau kelimpah ba Ulu Belaga.
Ku iya, 17 bengkah kompeni ti udah diberi tanggungpengawa nganjung sereta nyadung barang sabsidi nya baka beras, tepung, minyak makai enggau barang bukai ti ngembuan tanda 1M Milik Suruhanjaya Koperasi Malaysia (SKM), Kedai Rayat 1Malaysia (KR1M), enggau Lembaga Pemasaran Pertanian Persekutuan (FAMA).
“Semua barang nya deka dianjung ngagai kedai tauka palan alai bejual barang ti endang udah ditetapka nyual barang ti dijaga rega tauka udah diberi sabsidi nya tadi,” ku iya maya mansutka jaku pengelalu ba pengawa bejadika ‘Program Logistik Mobile KR1M Satu Malaysia Satu Harga’ ba Dewan Suarah ditu, kena ke malam Hari Lima tu tadi.
Program malam nya dipenyadika Menteri KPDNKK Datuk Seri Hasan Malek.
Ku Stanley, nengah program ti dipejalaika tu ila ulih mantu rayat ba menua tu kelebih agi ti diau ba menua pesisir ngambika ulih bebelika barang enggau rega sama baka di kandang nengeri.
“Program tu mega deka mantu ngurangka pemerat tanggung belanja tiap bengkah diri sebilik ba menua tu beduduk ari rega barang ti dicas enggau rega patut kelimpah enda ngenusahka rayat,” ku iya.
Pia mega ku iya, nengah program tu nyadika sebengkah chara Perintah Menua meransang peranak menua tu bebelika barang tauka produk ti digaga ba menua tu empu lalu ngurangka pengawa mensia mayuh belandikka produk ari menua luar.
Ku iya, beduduk ari rega barang tu ti jauh murah ari rega barang ti dikeluarka ari menua bukai, enggau produk KR1M tu mega endang ulih mantu bala orang ti begaji mit enggau jelan pemesai ngambika ulih nyimpan sereta ngelimat belanja bulan sida beduduk ari rega barang tu endang rega patut lalu sama ikas enggau barang ari menua luar ti jauh mar rega.
“Nya alai, aku endang meransang bala orang dagang ba menua tu bebelika barang KR1M lalu bejualka iya enggau rega ti sama,” ku tandu iya.
Ku Stanley, ba Pelilih Menua Bintulu, KPDNKK endang ngelantik Harbour Services nyadika ijinsi tetap sida mai produk ari Semenanjung Malaysia sebedau disadung ngagai serata menua Sarawak, Sabah enggau Labuan enggau ungkus sabsidi ti ditanggung perintah.
Pemesai Pelilih Menua Bintulu Tuah Suni, Ketuai KPDNKK Bintulu Mohamad Drahman enggau Sekretari Politik Kaban parlimen Bintulu Zaiedy Nor Abu Nasier antara ke bisi datai.