KUCHING: Dato Hanifah Taib-Alsree (gambar) madahka diri rindu agi gawa kediri sereta bejalaika pengawa pengasih enggau pengelantang dibandingka enggau pengawa politik.
Iya madahka berita selebubu ti madahka iya seiku ari orang dikearapka apai iya Pehin Sri Abdul Taib Mahmud nganti penuduk di sitak Kunsil Nengeri (DUN) Balingian ukai pekara ti bendar.
Tang ku iya pemutus nentuka sapa bagi pengari tauka chalun ngati penuduk apai di sitak Balingian bepanggai ba Kepala Menteri Tan Sri Datuk Amar Adenan Satem.
“Aku bisi tanggungpengawa aku empu, enti nitihka aku nadai pengerindu dalam politik laban aku rindu agi ngemeran sereta ngemeratka kereja aku empu dalam pengawa pengasih enggau pengelantang.
“Pasal chalun ti nganti sitak Balingian ti puang diatu, semua nya bepanggai ngagai Kepala Menteri baru,” ku iya lebuh dikerandau pengarang berita seraya madahka diri enda arapka berita ke selebubu ngapa.
Hanifah dikerandau pengudah iya ti ngulu pengawa ngangkat sumpah Tan Sri Datuk Amar Adenan Satem ti nyadi Kepala Menteri Kelima ti diatur ba Astana Negeri, ditu kemari.
Speaker Kunsil Nengeri, Datuk Amar Mohd Asfia Awang Nassar ensanus udah nerima surat ari Pehin Sri Abdul Taib Mahmud ti madahka matak diri nyadi pengari rayat sitak DUN Balingian berengkah ari kemari (28 Februari).
Kelimpah ari nya, Sapit Ketuai Orang Indu Parti Pesaka Bumiputera Bersatu (PBB), Datuk Fatimah Abdullah lebuh ditanya sekalika bisi merambu deka ngambi indu bediri ba sitak DUN Balingian maya pengawa bepilih mit nengeri ila, iya madahka raban indu melabaka engka bisi chalun indu.
Iya madahka pemutus nya deka ditentuka pengudah Komiti Pengawa Bepilih nentuka kemaya pengawa bepilih nya deka diatur.
“Tang kitai nganti dulu berita ari Kunsil Pengawa Bepilih (SPR) madahka pekara bekaul enggau pengawa bepilih mit nya.
“Udah nya baru kami bejalaika pengawa ti patut sekalika pengari ari raban indu nyadi chalun,” ku iya ti nyadi Kaban Kunsil Nengeri (ADUN) Dalat.