KUCHING: Sapit Kepala Menteri Datuk Patinggi Tan Sri Alfred Jabu besemaya deka meri sukung ke pemadu besai ngagai Kepala Menteri ke baru baka sukung ke udah diberi iya ngagai Pehin Sri Abdul Taib Mahmud.
“Aku nyamin deka meri sukung enggau enda bebagi ngagai kepala menteri ke baru, Tan Sri Datuk Amar Adenan Satem.
“Aku pechaya ulih bekereja begulai enggau iya (Adenan) lalu nampung pengawa manah ti udah dipejalai Taib ungkup penegap politik, penyerakup pupu raban bansa, pengelikun enggau pengelantang Nengeri Sarawak,”ku iya.
Iya mansutka jaku tu lebuh dikerandau pemberita pengudah ngemata pengawa angkat sumpah kepala menteri baru ba Astana, Petra Jaya ditu, pagi kemari.
Ba pengawa nya, Adenan dichiri nyadi kepala menteri Sarawak ke-5 nganti Taib ti udah bejalaika pangku pengawa kepala menteri pengelama 33 taun.
Adenan ngangkat sumpah ba mua Tuai Pemegai Menua Tun Datuk Patinggi Abang Muhammad Salahuddin.
Ba kaul ke sama, Menteri Dagang Temuai enggau Pengawa Berumah Datuk Amar Abang Johari Tun Abang Openg bela ngembuan runding ke sama maya ditanya pemberita senentang pekara nya.
Ku iya, kepala menteri ke baru (Adenan) deka ngiring Sarawak nempa pemujur ke besai agi jemah.
“Sehari tu nyadi sebengkah agi sejarah besai ke ditempa nengeri Sarawak. Kepala menteri ke baru ngembuan mayuh peneleba ke alai aku udah bekereja begulai enggau iya kenyau ari taun 1980,”ku iya.
Abang Johari ke mega seiku entara tiga ketuai ti dikejaku dichiri nyadi kepala menteri ke-5 dulu agi ari tu madah diri enda ngembuan ati kemaru pengudah iya enda dipilih nyadi kepala menteri.
“Nadai jaku tauka ngembuan runding ke bansa nya. Aku deka meri sukung ke pemadu besai ngagai Adenan,”ku iya.
Seiku agi chalun kepala menteri, Menteri Pengatur Pengereja Asal enggau Rampa Memua Datuk Amar Awang Tengah Ali Hassan pechaya Adenan deka nampung pengawa manah ti udah dikereja Pehin Sri Taib.
Iya madah Adenan ngembuan mayuh peneleba lalu iya deka nentuka polisi perintah dipejalai enggau terit ungkup nempa pemansang ke besai agi.
“Atur besilih kuasa sehari tu dipejalai enggau lanchar ke alai kitai nyadang transformasyen tu ukai semina mai pemansang ba pekara luar , kitai mega nyadang semua pupu raban bansa deka bela ngasaika pemansang.
“Raban ketuai ke diatu deka bekereja enggau Adenan ngambika tau ngenukuka Nengeri Sarawak nyapai juluk ti udah ditetap,”ku iya.