KUCHING: Chairman DAP Nengeri Chong Chien Jen minta perintah Sarawak enda belalaika tarif caj kuasa lekterik ke diungkup ngagai kompeni ari menua luar kelebih agi ba palan SCORE enti dibandingka enggau caj ke diungkup ngagai peranak nengeri tu.
Ku iya, aku nemu tarif caj ke diungkup ngagai kompeni luar baka Tokoyama enggau Press Metal lalu anang mejal aku mantaika tarif ti diungkup ngagai kompeni bukai.
“Kitai mayar 30 sen per unit kilowatt/ jam ungkup tarif caj kuasa lekterik tang kompeni ari menua luar semina dipinta mayar 11.5 sen.
“Pinta bayar nya semina 1 ari 3 ke dibayar kitai peranak Sarawak. Anang nanya aku ari ni aku bulih tarif tu, tang penyampau tu meh ke dicaj ngagai kompeni luar.
“Anang ngemula peranak Sarawak,”ku iya lebuh dikerandau pengudah bejadi laman ‘Signature Campaign For Fairer Electricity Policy’ ba indu opis DAP ditu, kemari.
Ngenang kimpin ke benung dipejalai nyentuk ngagai 30 April 2014 nya, Chong madahka pengawa ngulihka sain rayat nya dipejalai enggau lanchar lalu nyadang ulih nyapai tagit 100,000 ke udah ditetap.
Ku iya, naka ke diatu ba pelilih mengeri Kuching kitai udah bulih 10,000 sain ke alai kitai nyadang mantaika interim riput ba penyampau ke endar ba pengujung bulan Februari tu.
“Semua sain tu deka dibai maya Aum Kunsil Nengeri ba bulan May tu lalu kitai deka minta perintah tauka dewan ngurangka tarif ngagai 30 persin,”ku iya.
Dikena nentuka juluk 100,000 sain nya dijapai, Chong madah DAP deka nyiri 2,000 iku orang ba sereta nengeri nyadi duta ‘roket’.
Tiap iku duta roket deka ngulihka sain enda kurang ari 30 iku orang, tandu Chong.
Bela datai ADUN Padungan Wong King Wei, ADUN Batu Kawa Christina Chiew, ADUN Pending Violet enggau MP Stampin Julian Tan.