SRI AMAN: Nembiak sekula diperansang regas dalam aktiviti kokurikulum kelimpah ngemeratka akademik.
Kaban Parlimen Sri Aman Masir Kujat madah, nembiak sekula dikearap ulih besemekih nyapai penyulut dalam pelajar tang sida mega patut malut diri dalam kokurikulum setipak enggau atur ke udah ditetapka piak sekula.
“Pelajar kena nentuka tikas pengidup nembiak sekula, tang taja pia, nyerumba enggau nya kita mega dilalau ngambika aktif dalam kokurikulum ambika chunto, baka masuk mayuh macham aktiviti lumba enggau main tauka gerempung ba sekula,” ku iya.
“Nadai jalai muntang enti deka mujur, nya alai, kita (nembiak sekula) patut bebendar besemekih dalam kedua-dua bidang tu kena ngemujurka juluk diri, ruang bilik enggau sekula,” ku tandu iya.
Iya bejaku munyi nya maya bejadika Program Pemilihan Atlet, Sekolah Menengah Kebangsaan (SMK) Melugu di padang sekula ditu, kemari.
Ku iya, falsafah pelajar bansa endang nyata iya nya besemekih ngerembaika pengulih nembiak ngambika ulih ngadaka mudal mensia ti bekualiti.
“Tetiap sekula di menua tu endang ngembuan juluk deka ngadaka nembiak sekula ti bepengelandik, bepenemu, ngembuan disiplin tinggi, beempu tanggungpengawa sereta ulih gawa begulai enggau mensia mayuh ke pengelikun menua,” ku iya.
Ku iya, berindik ari falsafah pelajar bansa nya, udah tentu perintah deka meda bala nembiak sekula mujur ba pelajar nyentuk ke renggat tinggi ke tau ngubah tikas pendiau diri jemah ila.
“Enti deka nampung pelajar ngagai renggat tinggi, enda chukup enti semina nyulut ba bidang akademik laban pemujur ba bidang kokurikulum deka dikemeratka mega.
“Ukai muntang enti deka mujur ba kedua-dua bidang tu. Taja pia, nya enda nyadika penanggul teulihka pemujur,” ku iya.
Sama bisi datai ba program nya, Prinsipal sekula nya Jamit Ajok, raban pengajar ke bukai enggau bala tuai raban bansa ngelingi menua nya.
Ba program nya mega, Masir udah ngagihka RM5,000 ngagai Gerempung Apai Indai enggau Pengajar (PIBG) sekula nya ngambika bisi dikena bejalaika aktiviti sekula nya.