KUCHING: Sapit Menteri Dalam Menua Datuk Dr Wan Junaidi Tuanku Jaafar nyangkal dawa ti madah polis udah ngetuka pengawa ngambi kaban baru.
Iya madah pengawa ngambi kaban baru mengkang dipejalai baka selama dikena ngisi pangku pengawa puang pengudah sekeda raban polis pinchin tauka ngemaduka diri.
“Tuduh ti madah KDN udah ngetuka pengawa ngambi kaban baru nya enda amat. Kitai mengkang ngambi rekrut baru dikena ngisi pangku pengawa puang pengudah sekeda raban polis pinchin sereta ngemaduka diri,”ku iya madah ngagai The Borneo Post nengah pesan jaku pandak (SMS) ensana.
Iya dipinta nimbal tuduh ti madah palan pematih polis diatu udah diketu sementara ketegal kurang belanja ke alai iya (Wan Juanidi) nyangkal tuduh nya.
“Perintah enggai jadi enda nyapai juluk ke udah ditetap ke mega sejalai enggau penetap ari Royal Commission for Betterment of the Police Force taun 2004 enggau 2005,” ku Wan Junaidi.
Bedau lama tu tadi, sekeda apai indai madah ngagai The Borneo Post ke alai anak sida udah mujur ba pengawa beperesa nyadi kaban polis bebulan ke udah tang naka ke diatu lalu enda dikangau ngulu latih.
“Aku bisi ninga ari seiku pematih ba Palan Pematih Polis Sarawak (PULASAR) ke mega seiku peranak ari genturung pendiau ke sama begulai enggau aku ke alai palan nya udah lama enda ngambi kaban baru ketegal nadai belanja,”ku seiku apai nembiak.
Komander PULASAR ACP Burhanuddin Abdul Majid taja pia enda ulih digiga nerangka pekara tu enggau silik.