NADAI DAYA: Peranak rumah panjai Lichai belindung ba sebuah langkau semina ngemata bekau api ke udah nganguska rumah sida.
SELANGAU: Rumah Lichai Pusong, Sungai Tepus, Ulu Balingian, panjai 16 pintu udah ambis angus diempa api, pagi kemari.
Penusah ke nuntung rumah panjai urung 180 kilometer penyauh ari pasar Sibu nya nyadi urung pukul 10 pagi alai maya penusah mayuh agi ari peranak rumah panjai nadai nguan rumah.
Pemangku Kepala Opis Bomba Enggau Penyelamat (BOMBA) Sungai Merah Graji Layau madah, opis sida nerima kangau urung pukul 10.08 minit pagi.
“Raban kami ke disempulang 24 iku raban ari Opis BOMBA Sungai Merah enggau Opis BOMBA Sentral Sibu datai ba palan penusah urung pukul 11.50 pagi ketegal kelalu jauh.
“Tang maya kami datai ditu rumah panjai nya udah ambis angus,” pia ku iya madah ngagai pengarang berita.
Taja pan baka nya ku iya, nadai penusah bakal sereta bebadi nyawa diriput bisi nyadi.
“Ba pansik keterubah api nyangka berengkah nyadi ari dapur.
“Tang kitai mengkang nandu pansik penusah angus tu,” ku iya sambil madah raban sida bekenaka ai sungai urung 400 meter penyauh ari rumah panjai dikena madamka api.
Graji mega maya tu madahka iya enda lantang ati enggau sekeda ari orang ti betengahka jalai alun laban enda meri kerejasama ngagai raban sida maya benung ba pejalai ngelawa palan penusah.
Ku iya, kelimpah ti jauh, ulah tu nekul bendar pengawa raban sida sereta tau ngujungka penusah nabanka nyawa nyadi.
Seiku ari bala rumah panjai tu, Muyah Merat, 50, maya dikerandau pengarang berita madah, api berengkah nyadi bepun ari dapur bilik sepiak iya.
“Maya nya aku baru tembu mandi tepedaka api benung nyerarai nyadi ari bilik sepiak lalu beguai megauka kami serumah.
“Tang tebal agi bala kami serumah nadai di rumah maya nya laban bisi nya gawa lalu bisi mega ngalu ke pasar,” ku iya.
Muyah madah, api bangat jampat nyerarai ti ngujungka iya enggau sida ke bukai enda mujur beambika keresa dalam bilik.
Taja pan baka nya ku iya, sida serumah benasit manah laban nadai seiku bakal nyengkaum iya empu ke baru gerai beputung sebulan lebih ke udah.
Penghulu Thomas Jawa ke bela bisi datai ngesah penusah ke nuntung rumah panjai nya ngambi awak ngelalau bala mayuh kelebih agi peranak rumah panjai ngambika semampai ngemeratka pengelikun.
“Tebal agi penusah angus bepun ari pengilap diri empu.
“Nya alai, kelebih agi sida ke indu anang enda bejimat maya nyumai, tentuka api dapur udah dipadam dulu enti deka mindah ke bukai,” ku iya.
Bepun ari penusah nya, Thomas ngarapka pengari rayat bagi menua nya ulih datai ngesah sereta meri bantu kena ngelempungka penusah ke nuntung urung 96 iku peranak rumah panjai nya.
Maya tu mega iya ngarika Opis Pelilih Selangau bisi nyuaka barang pemakai enggau dapur gis dikena mantu peranak rumah panjai nya.