Nembiak rebak baru dikearapka ngembuan pengerindu sereta semampai belematika pemesai guna muzik enggau tanda raban bansa
KUCHING: Kenyau udah ditumbuh, Sarakup Indu Dayak Sarawak (SIDS) seruran ngemerat juluk ngatur kelas ngajat kelebih agi diungkupka ngagai nembiak rebak baru.
Sekretari SIDS Datin Senorita Linang madah atur nya deka nyaup nentuka main asal bansa Dayak nya majak dikembuan enda peputus, ari rebak siti ngagai rebak ke siti.
“SIDS angkun ngatur kelas ngajat ngambika ulih ngemansang, ngidup enggau ngetanka muzik sereta tanda ajat mayuh pupu raban bansa.
“Kelimpah nya, atur tu disadang ulih nerenak pengangkun enggau pengerindu pasal pengaya daya idup raban bansa di Sarawak dikena negika identiti bansa diri empu,” ku iya.
Iya mansutka jaku tu ba pengawa Pekit Ngajat Beraban & Karaoke Lagu Solo 2014 ke diatur SIDS pampang Kuching ditu, kemari.
Iya ke mega penyanding penemu SIDS pampang Kuching madah SIDS meransang nembiak rebak baru berati sereta belematika pemesai guna muzik enggau tanda ajat enggi kitai.
Ku iya, ba dunya ke diatu raban nembiak baru patut enda lina diperindang daya idup ari luar ti tau ngujungka sida nadai ngembuan pengerindu ba muzik enggau tanda ajat asal enggi bansa diri.
“Pengawa kitai ti ngemeranka muzik enggau tanda ajat tau nyadika penyungkak ngagai ngagai daya idup bansa Malaysia, tandu iya.
Ba pekit ngajat beraban ke diatur kemari, tim Kumang Bajik Tampung Puji ari Bandar Baru Samariang teulihka gelar champian ngalahka tujuh tim bukai.
Lumur dua pulai ngagai tim Kumang Perenching Tampak Rita ari Batu 12 Jalai Penrissen lalu penuduk lumur tiga pulai ngagai tim Sri Sebayor ari Kampong Sebayor, Samarahan.
Pekit belagu karaoke solo dibagi ngagai dua kategori iya nya ungkup nembiak beumur 10-15 taun ke dipasuk tujuh iku penanyi enggau ungkup umur 16–25 taun ke dipasuk enam iku penanyi.
Bela datai ngulu pengawa kemari Chairperson SIDS pampang Kuching Monica Sita Gaik, Chairman SADIA pampang Kuching Dato Anthony Nait, Eksekutif Sekretari SDNU TR Spencer Birai enggau orang bukai.