KUCHING: Sapit Menteri Besai Tan Sri Muhyiddin Yassin nemuai matau rega barang ba Pasar e-Mart Matang pengelama sejam ditu, kemari.
Iya disempulang Sapit Kepala Menteri Datuk Patinggi Tan Sri Alfred Jabu, Sekretari Perintah Nengeri Tan Sri Datuk Amar Mohamad Morshidi Abdul Ghani, Menteri Dagang Dalam Menua, Koperasi enggau Orang Bebeli Barang Datuk Seri Hassan Malik sereta Menteri Kereja Raya Datuk Fadillah Yusuf.
Ba penemuai nya, Muhyiddin bisi berandau enggau raban orang dagang sereta betanya senentang pangka rega barang ti niki ngagai dagang sida.
Udah nya, iya ke mega Sapit Chairman BN Menua ngejang ngagai sebengkah hotel ditu lalu ngulu randau begulai Gerempung Orang Bebeli Barang enggau Penaja sebedau betemu enggau raban ketuai parti dalam serakup Barisan Nasional (BN) Sarawak.
Muhyiddin disadang deka ngulu Pengerami Ketuai begulai enggau Rayat di Sekolah Menengah Kebangsaan (SMK) Lundu pagila (sehari tu) lalu deka mulaika diri ke Kuala Lumpur lemai nya.