Sebedau sistem nya dikemeran mayuh pekara bukai patut diperatika sereta diserenih
KUCHING: Gerempung Pengajar Bumiputera Sarawak (KGBS) nyukung pemutus Opis Menteri Pelajar Malaysia (KPM) ti deka mansik baru sistem aplikasi Pentaksiran Berasaskan Sekolah (PBS) sebedau dipejalaika.
Presiden gerempung nya, Ahmad Malie madahka, sebedau sistem dikemeran mayuh pekara patut diperatika nyengkaum penyampau pengajar patut ditambah, sistem internet patut udah ulih dikemegah, raban bansa ulih mereti sistem nya sereta isu ke bukai.
“KGBS nerima manah sereta nyukung KPM ti deka mansik baru PBS sebedau dipejalaika.
“Lebuh KPM madahka PBS deka dipansik baru, KGBS amat berasai lantang sereta gaga ati laban KPM ninga sebana enggau penemu raban pengajar ti ngereja tauka bejalaika sistem nya.
“KGBS beterima kasih ngagai Sapit Menteri Besai ti mega Menteri Pelajar (Tan Sri Muhyiddin Yassin) laban ti mendingka sebana pengajar bekaul isu PBS. Ngarapka pansik nya ulih nyadi langkar pemadu manah ti nentuka sekalika PBS diteruska tauka enda,” ku iya madah ngagai Utusan Borneo ditu kemari.
Ahmad meri penemu iya lebuh dipinta meri penerang bekaul enggau Opis Menteri Pelajar Malaysia ti deka mansik baru sistem aplikasi PBS sebedau dipejalaika.
Nambahka nya iya ngarapka asil pansik sekalika bisi pengelemi tauka pemanah enda patut dipelalai sereta semina dikena ngemuaska ati pemesai opis menteri aja.
“KGBS tetap nyukung sebengkah polisi enti nyema amat ngenataika pemanah tauka penguntung lalu enda ngirauka semua piak nyengkaum raban bansa lebih agi nembiak ti nyadi peneribu KPM sereta enda ngemeratka tanggungpengawa pengajar.
“Nya alai KGBS amat nyukung pemutus KPM ti deka mansik baru PBS. Anang udah tepantup baru deka engkadah tauka udah tesat baru deka nikal baru ke pun jalai,” ku iya.
Dalam ripot Bernama kemari madahka, sistem aplikasi Pentaksiran Berasaskan Sekolah (PBS) deka dipansik baru pengudah macham ripot diterima ari raban pengajar.
Sapit Menteri Besai Tan Sri Muhyiddin Yassin madahka Opis Menteri Pelajar patut mansik sistem nya beduduk mayuh penanggul tauka pengelemi ba pengawa ngerikod pekara dalam pangkalan data pengkomputeran sistem nya.
“Naka ke ditau, sistem aplikasi PBS ditangguhka dulu ngagai bulan April tu ila, taja pia pengajar agi dipinta ngerikod pekara ti bekaul enggau PBS ngena chara asal (manual) enda ngena komputer,” ku iya.