KUCHING: Enda milih sapa ke dipilih Kepala Menteri (KM) Pehin Sri Abdul Taib Mahmud nganti iya, kami tetap nyukung orang nya, ku Sapit Kepala Menteri ti mega Sapit Presiden PBB Datuk Patinggi Tan Sri Alfred Jabu.
Ku iya, maya aum Kaunsil Tinggi (MKT) Parti Pesaka Bumiputera Bersatu (PBB) bedau lama tu tu tadi, sida udah besetuju enggau penemu Taib milih orang kedeka iya empu.
“Aku ngelalu ngena leka jaku selamat bejalaika pengawa ngagai Tan Sri Datuk Amar Adenan Satem ke deka mangku pengawa nyadi Kepala Menteri lalu kami tetap meri sukung ngagai iya.
“Lalu, aku beterima kasih ngagai Taib ke penyulut pengawa iya. Ke penyabar iya, penemu, penyiru iya ke kami sereta ngiring ngembing semua kitai lalu ngaga pemansang di Sarawak baka ke diatu, lebih agi baka penyerakup entara pupu raban bansa,” ku Jabu madah maya dikerandau pengudah atur pengawa Taib nyuaka surat ngelengka pangku pengawa belabuh 28 Februari tu ila.
Presiden Parti Demokratik Progresif Sarawak (SPDP) Tan Sri William Mawan Ikom madah, Taib milih Adenan nganti pangku pengawa iya laban sida iya udah lama bekelala.
“Ukai semina nyadi ipar iya, sida (Taib-Adenan) mega bakih. Nya alai, ari sukut kualiti nyadi ketuai sereta pejalai jemah ila menua tu, enda ibuh kitai irau.
“Pehin Sri (Taib) enggau Tan Sri Adenan sigi bakih lama ari Pehin Sri nyadi Kepala Menteri lalu ke bukai (sapit presiden PBB Abang Johari enggau Mandal Presiden Kanan PBB Awang Tengah) semina masuk politik udah nya….Nya alai, sapa ke tuai agi,” ku Mawan.
Ba penemu Menteri Pemansang Tanah Sarawak Tan Sri Dr James Jemut Masing madah, Adenan pilih ke manah laban sida bisi pengelandik megai tanggung pengawa nyadi Kepala Menteri.
Iya mega madah, iya pechaya ke Adenan ulih megai tanggungpengawa nya taja pan baru nyadi Kepala Menteri sebedau pengawa bepilih menua tu ila.
“Taja pan timpuh ke ditapi iya pelaba aku nyangka bisi pedis mimit dalam dua taun tu ila, tang aku pechaya iya ulih ngereja pengawa iya.
“Aku nemu dalam berapa bulan tu ila, iya deka numbuhka injin besedia napi pengawa bepilih menua ti deka datai tu ila,” ku iya.