SRI AMAN: Rayat kitai di Malaysia untung endar laban menua tu seruran lantang sereta likun, pia ku Kaban Parlimen Sri Aman, Masir Kujat.
Ku iya, ukai semina nya aja, rayat pupu raban bansa mega idup likun sereta bebasaka pangan diri ari segi batang pengarap, adat enggau pekara bukai.
“ Nya alai, nadai kala nyadi penyarut ba raban bansa baka ke nyadi diksekeda menua bukai di dunya tu. Berindik ari nya meh menua kitai ulih ngemujurka langgur pemansang nyentuk ke menua kitai maju sereta besemekih enggau sekeda menua bukai dalam mayuh bengkah bidang”, ku iya.
Iya bejaku munyi tu ngagai pemberita sepengudah ngabang Taun Baru China ba Pengerami Nyambut Pengabang ba rumah seiku orang dagang, Sim Hua Hong di Kampung Sungai Tandok, Undop ditu apin lama ke udah.
Ku iya, kitai rayat Malaysia patut berasai lantang ati laban ulih begulai enggau pangan diri enda ngira bansa enggau batang pengarap sereta ngembuan ulah ke penyayau. Ulah ti suah betulung, enda ngira bansa enggau batang pengarap mega suah dipeda kitai lebuh maya ke dituntung penusah ngenyit baka penusah angus, ampuh bah enggau sekeda penusah bukai.
“Peda aku, semua gerempung enggau serakup endang seruran sedia nyuaka bantu enti maya bisi nyadi penusah ngenyit tauka maya bantu ti deka diguna. Aku arap ulah ke baka tu bisi belama ngambika semua serak ulih idup lantang sereta likun.
“ Aku mega arap endar ati, nengah penyerakup ke dikembuan rayat pupu raban bansa, penegap politik enggau polisi perintah, kitai ulih terus meri bantu ngagai orang ke kurang benasit ngambi sida ulih ngasaika nengah jalai pengidup ke meruan agi”, ku iya.
Nyempulang iya ba pengerami nya, Menteri Muda Pemansang Menua Pesisir enggau Pengawa Berumah Sarawak ke mega Kaban Kunsil Nengeri (ADUN) Simanggang, Datuk Francis Harden Hollis, Residen Bagi Menua Sri Aman, Jonathan Lugoh, Pemesai Opis Betanam Betupi Bagi Menua Sri Aman, Badin Unol, Pemesai Khas Kaban Parlimen Sri Aman, Edmund Pirang, Sapit Chairman Opis Pelilih Sri Aman (MDSA), Kunsilor Sawing Sumar, Penghulu Micheal John enggau Pengulu Entika.