ROHANI
Tu dikena ngenukuka pengelantang, pengelikun peranak di Pulau Bruit
KUCHING: Perambu ngaga sereta nyambung jalai besai ke Pulau Bruit dikearapka lebih dikemeratka perintah, dikena ngenukuka pengelantang enggau pengelikun peranak di menua nya.
Menteri Pemansang Orang Indu, Ruang Bilik enggau Raban Bansa, Datuk Seri Rohani Abdul Karim madah, peranak menua endang ngarapka penyambung ti lebih engkeman dibandingka enggau ke diatu sungai nyadika penyambung ngagai Pulai Bruit.
Nitihku iya, perambu ngaga tauka nyambung jalai besai ke Pulau Bruit endang bisi dalam perambu perintah.
“Nyadi aku (ti nyadi pengari rayat) mai pesan ari peranak Kampung Tekajong tauka semua peranak di Pulau Bruit, ti bisi 10 genturung pendiau di Kampung Bruit sereta sebuah rumah panjai, ke ngarap sereta begunaka jalai besai nyadika penyambung.
“Pekara tu udah diperatika Menteri Besai sereta semua pekara bekaul enggau nyambung jalai besai nya udah bisi. Nya alai kitai ngarapka sida (di Pulai Bruit) lebih dikemeratka.
“Enti nitihka lis ke ditikal baru ngagai kitai, endang dikearapka projek jalai nya (ke Pulai Bruit) lebih dikemeratka perintah. Kitai besampi ngambika pekara tu ulih dikemendar enggau jampat,” ku iya.
Rohani mansutka pekara nya dalam aum pengarang berita ditu kemari, lebuh ditanya bekaul perambu nyambung jalai besai ngagai Pulau Bruit.
Dulu ari nya Rohani nyerumba pengerami Taun Baru China nemuai ngagai 20 iku orang sakit ba Wad Hematologi Sepital Besai sarawak (HUS) seraya ngabas seiku tukang gambar surat kabar Utusan Sarawak, Suzanne Empan ti sama ba wad nya.
Nandu baru iya ngarapka Menteri Besai Datuk Seri Najib Tun Razak sereta kabinet ulih ngemeratka peranak menua nya sereta Sarawak, lebih agi ti agi nengah sungai nyadika penyambung.
Kebuah pia ku iya, laban sungai di Sarawak chukup besai lalu peranak di nengeri tu endang begunaka tikas pengelikun enggau pengelantang ti meruan.
“Dalam dua tiga hari tu mayuh macham penusah karam nyadi,” ku iya amat ngarapka perintah ulih beratka peranak Sarawak, lebih agi ti agi betengahka sungai.
Apin lama ti udah, insiden perau panjai lungkup di muara Batang Lassa kena 18 Januari, ti mai 27 iku orang, lalu ari penyampau nya 11 iku bebadi nyawa sereta 16 iku selamat.
Nitihka riput berita, raban nya pulai ari Kampung Saii ngagai Kampung Tekajong, pengudah ngulu pengerami kawin.