SRI AMAN: Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis arapka genap bengkah pengerami ke diintu pupu raban bansa di menua tu tau nyadika pelasar kena ngemujurka juluk 1Malaysia ke ditengkebang Menteri Besai sebedau tu.
Ku iya, genap bengkah pengerami ke diintu rayat Malaysia enda ngira di Sarawak, Sabah enggau Semenanjung Malaysia patut diintu semua pupu raban bansa.
“Udah nyadi gaya pengidup bansa kitai kelebih agi di Sarawak maya bisi pengerami, kitai deka ngabang ngagai bala kaban belayan, pangan sereta orang ke diau semak enggau kitai enda ngira penuduk, pangkat enggau jalai pengarap kena ngelaika kitai semua tu dalam 1Malaysia,” ku iya.
Iya ke mega Kaban Kunsil Nengeri (ADUN) Simanggang bejaku munyi tu sepengudah ngabang ngagai Pengerami Rumah Tebuka Taun Baru China bala ketuai bansa China ditu kemari.
Ku Francis baru, pengawa ngabang tu endang nyelai sereta patut dipajakka belama kena ngenegapka penyerakup ba rayat pupu raban bansa.
“Penyerakup rayat pupu raban bansa di nengeri tu beguna amat ngambika kitai ulih nyingkang maju ke mua.
Ku iya, rayat meri terima kasih ngagai perintah Barisan Nasional (BN) laban ngembuan polisi ke manah amat ba semua pupu raban bansa. Perintah BN mega endang enda bechiping ati ba semua polisi enggau perambu pemansang sida.
Sama bisi datai ngulu pengerami nya, Kaban Parlimen Sri Aman, Masir Kujat, Residen Bagi Menua Sri Aman, Jonathan Lugoh, Pemesai Khas Kaban Parlimen Sri Aman, Edmund Pirang, Sapit Chairman Majlis Daerah Sri Aman (MDSA), Kaunsilor Sawing Sumar, Pengulu Micheal John Sanggop, bini Francis, Datin Simba Nallang enggau sekeda bala tuai raban bansa bukai.