KUCHING: Kaban Elvis Presley Fan Club Borneo (EPFCB) nyengkaum artis Elvis menua tu bisi ngatur pengerami dikena ngingat seiku pemuzik ke tebilang di dunya nya niang Elvis Presley nengah merindang bala peminat ba Highlander Shelter Café Batu 3 ditu malam Hari Lima tu tadi.
Bala artist ke bisi enggau ngena pekayan Elvis nya Wilfred Vincent Ragam (Elvince); Ges Berundang (Elges); Valentine Tawie (Elval); Adrian David Junior (El Adrian), Azmi Jahidin (Eliaz) engau Eskandar Eyaw (El Kandar).
Ba pengunjung pengerami nya bala Elvises sama begulai belagu “Can’t help falling in love”.
Pengerami nya diatur orang ke bempu kafe Michael Uok enggau bala raban EPFCB sereta Memories of the past (or MOTP) betuaika presiden MOTP Toman Mamora ke bisi mega mai lagu hits Cliff Richard malam nya.
Nundaku Toman, pengerami nya ukai semina dikena ngingatka hari pengada Elvis Presley ke-79 taun tang mega dikena ngenang pemati seiku agi Peniru Elvis nya Niang Reynolds Gregory enggau mega hari pengada Elvince.
Reynolds (nama mansau Elrey) nadai kena 22 Jan 2010. Toman madahka kaban EPFCB enggau MOTP deka ngabas pendam Reynolds ba Pendam All Saints Tabuan Dayak ke alai iya deka ngulu sida sebuat besembiang dia.