KE PENGINGAT: Wan Zaizodin (kiba) benung nyuaka tepa ngagai Rohani (kanan) ba pengerami nya.
SRI AMAN: Indu Opis Polis Pelilih (IPD) Betong udah ngatur Pengerami ‘Jasamu Dikenang’ enggau ‘Dining In’ bepalan ba Rumah Rehat Kerajaan bagi menua Betong ditu, apin lama ke udah.
Pengerami nya bisi digulu Menteri Pemansang Orang Indu, Ruang Bilik enggau Raban Bansa Malaysia ke mega Kaban Parlimen Batang Lupar, Datuk Seri Rohani Abdul Karim.
Kepala Polis Pelilih Betong, Wan Zaizodin Wan Jaafar maya mantaika jaku pengelalu madah, pengerami sekali tu kena meri basa ngagai bala pengereja pengawa ke gawa ba IPD Betong ke betukar gawa ngagai IPD bukai di serata Sarawak.
“Kitai di IPD Betong besampi ngagai bala sida ke dipindah gawa ngagai palan baru di serata Sarawak semampai gawa enggau manah sereta chakah agi.
“Endang udah nyadi tanggungpengawa kitai ke gawa ba opis perintah, nyikap diri gawa ba endur bukai di menua tu,” ku iya.
Wan Zaizodin mega ngarapka kaban baru ke dianjung gawa ba IPD Betong ulih nelebaka diri enggau raban lama ba IPD nya.
“Aku meri selamat datai ngagai kita lalu sama meh kitai nyaga nama manah IPD tu sereta chakah agi gawa ke rayat,” ku iya.
Sama bisi datai ba pengerami nya Kaban Kunsil Nengeri (ADUN) Beting Maro, Razaili Gapor, ADUN Saribas, Mohammad Razi Sitam, Residen Betong, Datu Romie Sigan Daniel, Ketuai Pampang Khas Pelilih Betong, ASP Noor Illham Hadeni sereta sida ke bukai.
Ba pengerami nya, Rohani bisi nyuaka tepa nyadika kenang ngagai lapan iku kaban IPD Betong ari mayuh pampang ke pindah gawa ngagai IPD bukai di serata Sarawak.