LUBOK ANTU: Lumba enggau main ti meri pengeregas ngagai tubuh enggau untak, ulih mantu nembiak ngenegapka penyulut dalam bidang akademik.
Pekara nya dipadahka Kaban Parlimen Lubok Antu William Nyalau Badak lebuh bejadika Kejohanan Merentas Desa Sekolah Menengah Kebangsaan (SMK) Lubok Antu ti diatur ba sekula nya ditu, apin lama tu tadi.
“Kelimpah ari dikerindu, lumba enggau main mega dianggap sebengkah bidang ti meri penguntung tauka pemanah, laban aktiviti nya ulih ngenegap sereta ngangkatka pengeregas tubuh enggau untak.
“Pengeregas tubuh enggau pengelanchar untak, nya ulih meri pangka positif ba penyulut akademik kelebih agi ngagai semua (nembiak) ti benung besekula,” ku iya.
Ba pengerami nya, Nyalau nyuaka duit insentif ngagai 10 iku nembiak SMK Lubok Antu ti teulihka 5A ba pemutus peresa Penilaian Menengah Rendah (PMR) 2013.
Nyalau ti ngamatka semaya iya, meri insentif RM100 ke tiap sabjek ke bulih A.
Kelimpah ari nya, iya minta raban bansa di menua tu ngambika chakah ngatur macham lumba enggau main ngambika ulih mantu nempa mayuh agi nembiak bepengelandik dalam bidang lumba enggau main ti dipekitka.
Nyerumba pengerami nya iya bisi nyuaka chek Projek Mit Menua Pesisir (MRP) sepenyampau RM7,000 ngagai Kelab Polis Lubok Antu enggau PERKEP Lubok Antu (RM7,000).
Bisi datai ngagai pengerami nya Kepala Polis Pelilih Mit Menua Lubok Antu DSP James Jonathan, Ketuai Unit Pengatur Pemansang Raban Bansa Alta Abang Katum enggau bala pengajar di pelilih mit menua Lubok Antu.