KUCHING: Enti sema Akta Peniaga-Peniaga Barangan Terpakai (Second Hand Dealers Act) udah dikemendarka perintah, akta nya deka dikena tekala nya, kena nyeliah pengawa ngenchuri tali api ke balat endar nyadi di Bandaraya Kuching.
Menteri Pengawa Berumah, Datuk Amar Abang Johari Tun Openg madah enti akta nya udah dikemendar perintah lalu sida iya deka bekerejasama enggau polis bejalaika akta nya.
“Sigi bisi lisin enti nyual barang ‘Second Hand’ baka nya, nya alai, perintah bekerejasama enggau polis ngena undang-undang nya dikena ngurangka pengawa bechurika kabel enggau tali api,” ku Abang Johari.
Perintah begunaka ungkus RM2.3 juta dikena masang baru kabel enggau lampu ti udah dichuri.
Ku iya, perintah ka pan enda masang baru semua lampu ke lenyau tauka kabel ke dichuri kena nyikap diri ngelakuka Taun Nemuai Ke Malaysia 2014 kelebih agi nerima penatai temuai nyerumba Asean Tourism Forum (ATF) tu.
Abang Johari ke enda lantang ati meda pekara nya nyadi, ngarapka semua lampu baru tu enda lenyau agi.
Berindik ari perintah meri kelala ‘Second Hand Dealers Act’ ke dikerembai ngagai Sarawak dalam bulan Julai 2011, iya ngarapka undang-undang nya ulih ngurangka pengawa bechurika kabel tauka tali api di nengeri tu.
“Orang ke ditemu ngaga pengawa jai tu, iya nya sida ke nadai pengawa sereta gian dadah. Kadang-kadang, enti udah nadai duit agi kena meli bekal dadah, jalai ke pengabis muntang, enchuri tauka ngeruntun.
“Nya ke nyadi penanggul pengawa rama di nengeri tu. Taja pan ukai semua ke ngereja nya tang bisi ‘sekeda’ ke betapi enggau penanggul pengawa rama,” ku iya seraya madah perintah udah minta bantu ari polis tang mensia mayuh mega dipinta besaup nagang penyalah rama tu ari ti majak nyadi.
Iya madah baka nya ba atur pengawa nyuaka geran Projek Mit Menua Pesisir (MRP) ngagai 36 Gerempung Ukai Dikuasa Perintah (NGO) enggau penyampau ungkup RM690,000, di opis iya di Wisma Perumahan ditu, bedau lama ke udah.
Ba randau nya, Abang Johari mega ditanya bekaul enggau peranak ke diau ba Kampung Kudei Lama ke bisi 300 ruang bilik, tang datai kediatu lalu bedau bisi kuasa karan.
“Perintah bisi perambu timpuh panjai diungkup ngagai genturung pendiau nya, tang tiap kali Perintah deka ngaga projek dia, peranak genturung pendiau nya mantah. Perintah deka ngubah pendiau peranak ke diau di Kpg Kudei Lama…Nya alai, Perintah deka ngasuh peranak ke diau dia meretika pemansang ke deka digaga perintah ke sida iya,” ku iya.
Taja pan iya dipegai DUN Batu Lintang, tang ukai reti perintah nadai perambu ngemansangka genturung pendiau nya.
Sigi bis. Laban kami berunding deka ngaga rumah tinggi (flat), nya kebuah Opis Menteri Pengawa Berumah bisi ngubah undang-undang rumah.
Iya madah enti dibanding Kpg Kudei Baru (baruh DUN Satok), jauh udah mansang, tambah mega mensia mayuh ke diau di genturung pendiau dia udah diberi lut tanah sida iya empu.