MERI PENERANG: Anthony (tiga kiba) begulai enggau pengereja pengawa JTS meri penerang ke beguna ngagai mensia mayuh.
SARATOK: Opis Tanah enggau Penyukat (JTS) Betong, terus ngatur randau bekaul Inisiatif Baru NCR enggau peranak ari kandang menua Lubok Nibong, Prepat, Kabong sereta Pelunga, Roban.
Superintenden JTS Betong, Anthony Aboi madah, sekeda ari kandang menua ke alai tanah NCR ke udah dikemendar ari baruh Inisiatif Baru NCR nya di kandang menua Sungai Undai Pusa, Kampung Serabang di Pusa enggau kandang Menua Lubok Selubang di Kampung Dit, Debak.
“Sekeda tuju program baka tu diatur ngambika meri penerang ke silik ngagai peranak menua awakka mereti pasal Inisiatif Baru NCR, berindik ari nya sida enda limpang ari penerang pelasar perintah.
“Kesatu nya, sukat perimeter nya dikena mida tanah NCR enggau tanah perintah. Tanah NCR nya deka digazet nyadi Rizab Gunasama Komunal ari baruh Seksyen 6 Kanun Tanah Nengeri. Pengawa Ngerizab ari baruh Seksyen 6 Kanun Tanah, nya sebengkah dokumen sah di baruh undang-undang ke meri jamin peranak menua ngempu tanah NCR sida.
“Udah nya orang ke ngempu tanah NCR dalam menua nya ke udah disukat perimeter tau merambu ngenukuka garis entara tanah diri enggau orang bukai ngambika Opis Tanah enggau Penyukat ninjau awak meri pala tanah di baruh Seksyen 18 Kanun Tanah Negeri ba tikas ke nangkan nya,” ku iya dalam randau bekaul enggau Inisiatif Baru NCR, semak ditu, ensana.
Kelimpah ari nya dalam sesi randau nya Anthony Aboi mega nerang ngagai peranak ba kedua-dua kandang menua nya ke mungkur tanah NCR di Sungai Sebaloh di Jalai Pusa/Sesang, Kampung Prepat, Sungai Bentuk enggau Sungai Plunga di Roban ke dipinta sida bedau lama ke udah diatu dikemendarka perintah ari baruh Inisiatif Baru NCR ngambika disukat perimeter lalu digazet nyadi Rizab Gunasama Komunal ari baruh Seksyen 6 Kanun Tanah Negeri.
Ku iya, hak ke atas tanah ke digazet nyadi Rizab Gunasama Komunal di baruh Seksyen 6 deka dikemataka sistem undang-undang adat sesebengkah raban bansa nya bekaul enggau bakani mindah lalu meri hak ngagai tanah, rumah tauka sebarang utai ke udah digaga di atas tanah nya deka dikena.
Urung 70 iku peranak menua dia bisi datai ngulu atur pengawa nya.