KUCHING: Ketuai Sekretari politik Kepala Menteri Abdullah Saidol minta perintah besai berundingka enggau lengkas pengawa ngaga atur penyambung jalai alun di Pulau Bruit ngambika ulih nyeliah penusah perau karam nyadi baru.
Ngenataika penyinu ngagai kaban belayan niang ba penusah karam di Batang Lassa Hari Enam tu tadi, iya madah, penusah ke sama kala udah nyadi suba sereta bela bisi nabanka nyawa.
“Aku ngenataika pinta tu ukai semina ngarika peranak Pulau Bruit tang mega ungkup semua peranak ke patut ngasai atur jalai alun ke menyana.
“Penusah ke baru nyadi tu udah nabanka mayuh nyawa lalu ngasuh ati kitai balat sinu, sida semua ari siti genturung pendiau,’ ku iya kemari.
Kaban Kunsil Nengeri Semop nya pechaya, penusah ke bansa nya ulih diseliah enti Pulau Bruit disikap enggau jalai alun.
“Sida milih ngena jalai ai ketegal pejalai nengah darat kelalu jauh lalu ditambah enggau jalai alun ti enda manah,’ku iya.
Ngenang senentang gaya jalai ke disedia maya tu, iya madah jalai nya mit lalu digaga ngena konkrit. Kenyau nyadi ADUN Semop berengkah 2011, iya madah pinta nyendiaka jalai ke manah agi seruran dikenatai ngagai ejensi ke megai kuasa.
“Pengundi di menua pesisir udah nyadi penyukung kuat Barisan Nasional lalu semua nya udah dipandangka maya pengawa bepilih besai tu tadi.
“Nuju perintah besai, balas sukung sida nengah chara meri agih belanja ke besai ti tau dikena nyendia perengka guna ngambika bida penyerekang kandang mengeri enggau menua pesisir ulih dikurang,”ku iya.
Sebuah perau panjai ke mai 27 iku penumpang ari Kampung Tekajong, karam ba Batang Lassa pengudah dipangka alun umbak enda jauh ari Kampung Kut Hari enam tu tadi.
Taja pan 16 iku selamat, lapan iku disah mati lemas lalu tubuh tiga iku mengkang apin temu.