Laman sosial deka meri awak ngagai pampang SABERKAS ngerijister nyadi kaban
KUCHING: Mayuh agi raban nembiak di nengeri tu disadang ngerijister diri enggau Gerempung Nembiak Bansa Sarawak (SABERKAS) pengudah laman sosial gerempung dilanchar kemari.
Presiden Datuk Amar Abang Johari Tun Abang Openg madah penumbuh laman nya deka meri awak ngagai raban nembiak ari semua 71 buah pampang SABERKAS ngerijister lalu ngaul diri ba program ke diadu.
“Laman tu mega deka ngemuntang semua raban gerempung ari tiap pampang bekomunikasyen enggau indu opis SABERKAS ngambika nemu pengawa ke diadu gerempung.
“Kelimpah ari nya, laman tu tau mega dikena sida ngelaku produk ke alai tu entara sebengkah ari atur ti dipejalai gerempung ngambika semua bekenaka ICT enggau pemadu engkeman,”ku iya.
Iya mansutka jaku tu ba siti aum pengarang berita pengudah ngulu aum komiti tinggi SABERKAS ditu, kemari.
Abang Johari ke mega Menteri Dagang Temuai enggau Menteri Pengawa Berumah netapka SABERKAS angkun ngadu kerejasama enggau Tabung Ekonomi Gagasan Anak Sarawak (TEGAS) ngambika raban nembiak dalam gerempung tetitihka kuing pemansang nengeri.
Ku iya, SABERKAS berundingka chara kati raban nembiak dalam gerempung tau ngambi bagi sereta nyaup ngemansang Sarawak.
“Gerempung deka ngangkatka pengelandik ke dikembuan raban nembiak ke alai penemu enggau penau sida tau nyaup ngerembai pemansang nengeri tu.
“Pengangkun tu setipak enggau juluk perintah nengeri ti deka ngangkatka Sarawak nyadi nengeri maju ke nyadika chunto ngagai nengeri bukai manggai ba taun 2030,”ku iya.
Kelimpah ari nya, iya mega madah kerejasama enggau palan pelajar tinggi perintah enggau swasta udah diadu endur numbuhka Kelab SABERKAS ti deka dipasuk raban nembiak universiti.
Kitai meda pengawa ngaul raban nembiak di universiti patut dikemerat. Kaul tu ulih ngerapitka bida penau entara ketuai enggau raban nembiak kelebih agi ba pekara ICT enggau teknologi, tandu iya.
Iya nambah, kaul entara raban ketuai enggau raban nembiak tau pulaika pemaik ke alai peneleba ke dikembuan raban ketuai enti dipegulai enggau penau raban nembiak deka meri pemaik ngagai gerempung.
Ba kaul ke sama , Abang Johari madah SABERKAS ke udah ngembuan lebih 130,000 kaban deka nyadi sebengkah gerempung ti ngangkatka raban nembiak lalu nya nyengkaum nembiak ke diau di menua pesisir.
Iya mega madah SABERKAS diatu udah ngerijister sereta nerima sukung ari mayuh raban ukai bumiputera lalu nya udah ngujungka gerempung majak tegap.
Ari gaya ke dipeda diatu, mayuh orang ukai bumiputera udah ngaul diri ba program ke diadu gerempung lalu kitai deka matak mayuh agi sida nyadi kaban, tandu iya.
Bela datai Sapit Presiden Datuk Lee kim Shin, Naib Presiden Datuk Abdul Karim Rahman Hamzah, Sekretari Besai Dr Abdul Rahman Junaidi enggau kaban komiti besai bukai.