KUCHING: Akta Keselamatan Dalam Negeri (ISA) 1960 enda deka digunakena taja pan nerima ansak ari mayuh raban sereta gerempung.
Menteri ba Opis Menteri Besai (Pekara undang-Undang) Nancy Shukri madahka pemutus nginsil ISA udah diperunding enggau silik ke alai Akta Kesalahan Keselamatan (Langkah-Langkah Khas 2012) tauka SOSMA udah dituku nyilih akt nya.
“Ngenanka orang ti dipelaba salah enggau enda dipechara nengah ISA mega nerima bantah ari mensia mayuh. Pengudah diperunding nya dikinsil lalu diganti enggau SOSMA.
“Akta baru SOSMA deka mantu raban pengintu pengelikun kelebih agi polis ngintu pemaik menua tauka nyeliah pengawa salah nyadi lalu sekeda pekara ba dalam ISA suba mega bisi dipasuk ngagai akta baru tu,”ku iya.
Nancy mansutka jaku tu ba aum pengarang berita pengudah bejadi pengawa Ngepun Taun Pengawa Undang-Undang 2014 (Kot Sabah enggau Sarawak) ba Bangunan Kot Lama ditu, kemari.
Iya nambah, SOSMA agi mengkang baru lalu enti bisi sebarang pengurang akt nya tau dikemanah baru ngambika chukup engkeman digunakena .
“SOSMA ukai dituku ungkup pemaik sekeda raban orang politik tang digaga ungkup raban orang ke megai tanggung pengawa ngintu pengelikun enggau pemaik menua,”ku iya.
Nengah SOSMA, perintah udah nyendiaka sebengkah akta ti ulih ngemantup pinta mensia mayuh sereta nentuka hak sida diintu manah, tandu iya.
SOSMA dikemendar Dewan Rakyat kena 17 April 2012 lalu dipesetuju DiRaja kena 18 Aril 2012, ke alai akta nya lalu digazet kena 22 Jun 2012.
Nengah akta baru nya, seiku pemesai polis ulih, enda begunaka waran nangkap sereta ngenan seseiku orang ti dipelaba ngereja penyalah ngeruga pengelikun menua. Orang nya tau ditan pengelama 24 jam ngambika dipansik lalu tau mega dilanjar ngagai timpuh 28 hari.
Ba atur pengawa kemari, raban orang ti ngaul diri dalam pekara undang-undang di Sabah enggau Sarawak bejalai bebala mayuh berengkah ari Hotel Pullman, Kuching nyentuk ngagai Bangunan Kot Lama.
Bela ngulu pengawa kemari Ketuai Hakim Malaysia Tun Arifin Zakaria, Hakim Besai Sabah/Sarawak Tan Sri Datuk Seri Panglima Richard Malanjun, Presiden Gerempung Luyar (AAS) Kahirul Azmi Mohd, Presiden Gerempung Undang-Undang Sabah (SLA) Datuk G.B.B Nandy@Ganesh sereta orang bukai.