LUBOK ANTU: Dua iku lelaki sama peranak Rumah Sebangki Panjai, Lubok Antu, Sri Aman belaya enggau pangan diri kena lemai Hari Satu tu tadi.
Seduai belaya bepun ari seiku pengajar ke berasal ari rumah panjai nya deka nurun ke sungai laban deka ngetan pukat urung pukul 6.15 lemai.
Sebedau sempat ngereja pengawa nya, enda memukai pengajar nya tadi dilawa seiku lelaki ari rumah panjai ke sama lalu ngerekak iya ketegal ngengkahka kerita Proton Saga ba mua rumah lelaki nya.
“Lelaki nya datai lalu nampar sereta mukut mata kiba aku,” ku pengajar nya madah ngagai pemberita bekaul enggau kes nya.
Ulah kasar lelaki nya ti ngujungka seduai lalu berekak sereta bejamahka pangan diri ba rumah panjai nya nyentuk ke pengajar bakal mimit muak ke bau kanan.
Peranak rumah panjai ke tekenyit meda seduai ke berekak lalu angkat sereta ngerara seduai.
“Aku enda nemu nama ulah lelaki nya baka nya. Tambah mega, aku nadai kala besengki jaku enggau iya sebedau tu. Enti aku nanya nama kebuah iya ngelaya aku, iya lalu nampar sereta mukut aku,” ku iya.
Berindik ari pekara nya, pengajar nya lalu ngaga riput ba Balai Polis Lubok Antu bekaul enggau kes nya urung pukul 7.05 malam sebedau dianjung berubat ke Sepital Sri Aman.