Taja indai iya udah bisi kad pengelala tang sida menyadi baka ke ukai peranak menua
SIBU: Ukai semina tusah ngiga pengawa tang semampai nangi maya mindah kin-kitu ketegal nyentuk ke sehari tu lalu nadai betingki.
Penusah tu nuntung Kado Nabau, 21 taun ari Rumah Sangga, Nanga Ulin, Ulu Poi, Kanowit.
Maya berandau enggau pengarang berita kemari, penusah tu bepun ari iya ke nadai ngembuan setipikit pengada kenyau ari suba.
“Laban nadai setipikit pengada aku enggau tiga iku menyadi ke bukai nyentuk ke sehari tu lalu empai bisi tingki.
“Penanggul iya diatu, aku suah niki Opis Pengerijister Bansa (JPN) pelilih Kanowit enggau Song tang penanggul tu empai mujur diputar sida,” ku iya.
Kado madah, maya iya datai ngelawa Opis JPN, iya seruran diasuh orang nganti belama.
Lalu empai lama tu tadi, maya iya niki ngelawa opis nya di Kanowit, orang dia madahka enda chukup tubuh ngaduka penanggul iya nya.
“Tu ngasuh aku alit ati nama kebuah opis nya tau enda chukup tubuh ngaduka penanggul aku tu isa ngelama tu sida ngasuh aku nganti belama,” ku iya nandu.
Penanggul tu ku iya, kala mega nuntung indai iya, Ronie Ilun ti lebih setaun nganti tingki tembu taja udah beberapa kali niki opis JPN.
Taja pan baka nya sida sebilik berasai lantang ati laban kena bulan Julai 2013 baru indai iya bulih tingki lalu opis JPN madahka sida semadi tau ngaga setipikit beranak sebedau ngaga tingki.
“Tang aku enda nemu taja indai (Ronie) udah bisi tingki, kami menyadi lalu empai ga ulih ngaga setipikit beranak sebedau ngaga tingki,” pia ku iya madah enggau ngemetak.
Kado madah, ketegal pekara tu iya suah kundang-kasang ngelawa Opis JPN Song enggau Kanowit lalu ngemansutka belanja ti besai ke tambang bas ari Bintulu maya ke agi gawa din suba sebedau nepan ekspress.
Belanja nya ku iya empai nyengkaum nyuwa hotel enggau belanja makai.
“Penanggul tu balat agi nating pengidup aku laban diatu kem batang alai aku gawa udah ditutup.
“Ka ngiga pengawa ke bukai, aku nangi bendar bejalai kelalu jauh ke menua orang laban nadai tingki baka peranak menua tu ke bukai,” ku iya ti semina besekula naka Pom 2 aja.
Kado mega madah, maya ke agi gawa di Bintulu suba, tauke alai gawa enda berani ngaji iya kelalu lama laban nadai tingki.
Nambahka nya ku iya, iya balat bendar tusah ati ketegal ke enda ulih ngaga peminta minta bantu perintah baka Bantu Rayat 1Malaysia (BR1M) ti deka diberi enda lama agi tauka peminta ke bukai.
“Aku minta kasih ngagai opis enggau orang ti bekaul, nyaup aku enggau kami menyadi ke bukai mutarka penanggul tu.
“Ngarapka penanggul tu lengkas diputar ari mengkang nating pengidup kami menyadi ngambika ulih idup tauka gawa ngagai mengeri baka orang bukai isa enda mujur besekula ngulihka pengawa menyana,” ku iya nandu.