100,000 TANDA JARI: Chong (empat kiba, duduk) begambar enggau bala komiti iya sebedau baum ba Indu Opis DAP.
KUCHING: DAP nengeri merambu deka ngumpul 100,000 tanda jari dalam kandang taun tu kena nagih penurun 30 peratus tarif lekterik.
Tu sebengkah juluk parti ke mega numpu ba pengawa bepilih ke deka datai tu seraya ngemujur ngangkatka projek Impian Sarawak.
Kepala DAP Nengeri Chong Chieng Jen madah, peranak Sarawak enda tau enda diberi tarif lekterik diatu nya tekat Bakun udah ngemansutka kuasa 2,400 megawatt ungkup dikena ditu enggau guna industri.
“Kitai bisi kebuah minta penurun dalam tarif lekterik. Enti enda nadai adil ga Syarikat Sesco Berhad (Sesco) ulih bejualka lekterik sida ngagai kilang pengelela di Samalaju ba rega 11 sen seunit, tang rega ba kitai nya 30 sen seunit.
“Indah Sesco ulih ngaji orang menua tasik nyadi CEO enggau konsultan bepuluh miliun ringgit. Aku nyangka enda ibuh semua nya,” ku iya nyebut ngagai pemberita sebedau bechairmanka aum parti nengeri ba Indu Opis DAP ditu kilah ensana.
Chong, ke mega MP Bandar Kuching enggau ADUN Kota Sentosa bedawaka Sesco udah melanja lebih RM20 miliun ba bayar gaji enggau elawin CEO enggau kompeni konsultan bukai ari menua tasik.
Ku iya tu kebuah kompeni mekal karan nya beabiska belanja, kelimpah ari duit menua ke lilih pansut ngagai menua bukai.
“Sarawak enda kurang orang ke pandai ngambi bagi pengawa sida nya. Enti (Dato Sri) Idris Jala ulih nyadi kepala Pemandu, ba aku nama kebuah orang menua ditu empu enda tau diambi nyadi kepala Sesco.”
Enti kitai meda diatu rega barang nyau majak niki, ku Chong tu meh maya penurun tarif lekterik digaga dikena ngelempungka tating penusah rayat.
Lebuh ke nyaut tanya, iya madahka parti nya deka nyaran peranak Sarawak ke beumur 18 enggau ke atas ngambika nyukung kimpin tanda jari nya.
Iya meri anggar urung 30 peratus penyampau peranak ditu deka datai meri sukung nambahka
“Diatu nya pemayuh tubuh kitai nyau manggai 2.6 miliun. Aku nyebut kitai nya nyaran 30 peratus nyainka peminta nya.”