SELANGAU: Peranak ke diau ba palan ke muntang kena ampuh bah kelebih agi baka ba menua Lubok Bemban ditangkan ngambika meri kerejasama ngagai opis ti bekaul.
Pemesai Opis Pelilih Mukah Shafrie Saili madah, peranak tu patut semampai meri riput ke pemadu baru senentang pekara ampuh bah ke bisi nyadi ba menua sida ngagai Bilik Gerakan Banjir Sitak Mukah enggau Opis Pelilih Mukah.
“Kerejasama antara dua piak tu beguna dikena ngemuntangka kitai meri bantu baka barang pemakai tauka pengawa mai sida mindah ngagai palan ke likun agi.
“Berindik ari pekara tu, kitai ngarapka bala tuai rumah tauka mensia mayuh ke bukai ulih meri kerejasama ti patut ngambika penusah ke nuntung ulih dilempungka agi,” ku iya.
Iya mantaika penemu nya maya dikerandau pengarang berita ba pengawa nyuaka bantu ngagai sida ke ditinggang penusah ampuh bah ari Menteri Pemansang Pengintu Penglantang, Pekara Orang Indu enggau Ruang Bilik Datuk Fatimah Abdullah ba jelatung Pasar Selangau ditu, empai lama tu tadi.
Bantu ari Opis Pengintu Pengelikun Raban Bansa (JKM) pelilih Mukah nya disuaka ngagai 285 pintu ari 18 buah rumah panjai ba menua Lubok Bemban ke udah ditinggang ampuh bah kenyau 30 Disember 2013 ngagai 1 Januari tu tadi.
Pengawa tu bela dikemataka Residen Mukah, Mohamad Supiah Hamdan.
Kaunsilor Andrewson Kalong ari Lubok Bemban mega beterima kasih ngagai perintah Barisan Nasional (BN) ti udah ngelempungka tating penusah ke nuntung sida.
“Bantu tu nyengala bendar mandangka perintah BN semampai sinu meda penusah ke nuntung rayat. Nya alai, aku ngarika kami ari Lubok Bemban meri besai terima kasih ngagai perintah BN,” ku iya maya dikerandau pengarang berita.
Tuai Rumah Sumut Sait ke mega ari Lubok Bemban madah, iya berasai temegah ati nerima bantu perintah sehari nya.
“Terima kasih kelebih agi ngagai Datuk Fatimah laban udah mantu kami.
“Tu mandangka iya (perintah) enda ngelengka ke rayat ngasaika penusah kediri,” ku iya madah.