KUCHING: Penerang ke dibantaika Chairman Kaunsil Konsultasyen Penyerakup Bansa (NUCC) bekaul enggau pengawa Opis Pengarap Islam Selangor (JAIS) ngerampas bup Kudus ari Gerempung Bup Kudus Malaysia (BSM) mandangka pengawa JAIS nya salah.
Menteri Pemansang Tanah Tan Sri Datuk Amar Dr James Masing madah, pandak jaku, pengawa ke dipejalaika JAIS nya endang salah lalu penerang ari Kaunsil Bar Malaysia mega madahka pengawa sida (JAIS) ngelanggar undang-undang.
“Utai ti deka ditemu kitai diatu, bisi ke enda atur ke patut dilempai ngagai pemesai ke ngereja penyalah nya tauka semua bup ke dirampas udah dibuai sida,” ku Masing madah nengah mesej kemari.
Masing nimbal tanya bekaul enggau penerang dibantaika NUCC ti madahka ulah JAIS nya salah sereta tau bendar mechahka penyerakup bansa di menua tu.
Chairman NUCC Tan Sri Samsudin Osman madah, NUCC pechaya isu sensiviti ugama Islam ke benung angat dikejaku diatu ulih diputarka enggau chara berandau sereta enda malut agenda penyerakup bansa.
“NUCC enda setuju enggau pengawa JAIS ke ngerampas bup Kudus nya, nya alai kami ngansak perintah nitihka Sempekat 10 Pekara begulai enggau raban Keristin di menua tu ke disetuju ba bulan April 2011 suba.” ku Samsudin.
Masing, ke mega Presiden Parti Rayat Sarawak (PRS) madah, pengawa JAIS ke ngerampas bup Kudus ari BSM insiden kedua kali udah dipejalaika piak bekuasa pengarap Islam di Semenanjung Malaysia sekumbang beberapa bulan tu.
“Pengawa JAIS nya sigi enda patut amat. Malaysia ukai sebuah menua ti ngemeranka adat kasar. Kita dipegai perintah bepelasarka undang-undang,” ku iya.
JAIS bedau lama tu tadi udah ngerampas 300 bup Kudus versi Bahasa Melayu enggau jaku Iban dikena nagang nguna lekajaku ‘Allah’ dalam bup Kudus nya ke dipadahka ngelanggar Enakmen 1988.